Avropa İttifaqının (Aİ) keçmiş xarici siyasət rəhbəri Federika Moqerini Aİ tərəfindən maliyyələşdirilən diplomatik təlim proqramında mümkün dələduzluq halları ilə bağlı aparılan istintaq çərçivəsində saxlanılıb.

Avropa Baş Prokurorluğu (EPPO) bildirib ki, istintaqın bir hissəsi olaraq Brüsseldə Aİ-nin diplomatik xidmətinin mənzil-qərargahında, həmçinin bir neçə kollec və təlim müəssisəsində axtarışlar aparılıb. Bundan əlavə, şübhəlilərin evlərində də əməliyyat keçirilib və ümumilikdə üç nəfər saxlanılıb.

İttihamlar Aİ tərəfindən gənc diplomatlar üçün maliyyələşdirilən “Aİ Diplomatik Akademiyası” layihəsi ilə bağlı tender prosesində pozuntular ehtimalı ilə əlaqələndirilir. İstintaq çərçivəsində layihəni həyata keçirən Avropa Kollecinin tender meyarlarına dair əvvəlcədən məlumatlı olduğu iddia edilir.

EPPO istintaqın davam etdiyini, yeni detalların yaxın günlərdə açıqlana biləcəyini bildirib.