İranda davam edən etirazların yeddinci günündə ölkənin ali dini lideri Əli Xamenei məsələ ilə bağlı açıqlama verib. O, etiraz aksiyalarında iştirak edənləri “qiyamçı” adlandırıb və iğtişaş törədənlərin “yerinə otuzdurulmalı” olduğunu bildirib.

Yanvarın 3-də 2019-cu ildə ABŞ tərəfindən öldürülmüş SEPAH-ın Qüds briqadasının komandanı Qasım Süleymaninin ailəsi ilə görüşü zamanı danışan Xamenei etirazların əsas səbəbi kimi göstərilən dolların kəskin bahalaşmasını “düşmənin işi” adlandırıb. Onun sözlərinə görə, etirazları alovlandıran xarici qüvvələr və onların “muzdluları” bazarların arxasında dayanır, antiislam və antiiran şüarlar səsləndirirlər.

Xamenei hökumətin dinc etirazçılarla dialoq aparmalı olduğunu desə də, iğtişaş törədənlərlə danışmağın mənasız olduğunu vurğulayıb.

Ali dini liderin çıxışı ABŞ Prezidenti Donald Trampın yanvarın 2-də verdiyi bəyanatdan sonraya təsadüf edib. Tramp həmin bəyanatında ABŞ-ın İrandakı etirazçılara yardım göstərə biləcəyini demiş və İran hakimiyyətini aksiyalar zamanı etirazçılara atəş açmamağa çağırmışdı.

Qeyd edək ki, İranda etirazlar artıq 7 gündür davam edir. Aksiyalara səbəb dolların kəskin bahalaşması və bunun fonunda həyat şəraitinin daha da ağırlaşması olub. Etirazlar ölkənin 30-dan çox şəhərini əhatə edib. Məlumatlara görə, aksiyalar zamanı təhlükəsizlik qüvvələrinin etirazçılara atəş açması halları da qeydə alınıb.