İranın ali dini rəhbərliyinə daxil olan iki nüfuzlu molla – Nasir Məkarim Şirazi və Hüseyn Nuri Həmədani ABŞ-ın keçmiş prezidenti Donald Tramp haqqında sərt açıqlamalarla çıxış ediblər.

Molla Şirazi, Donald Trampın İran lideri Əli Xameneiyə qarşı yönəlmiş hədələrinə və İrana qarşı hərbi ritorikasına cavab olaraq, onu “Tanrının düşməni” adlandırıb. O, bu bəyanatı 28 iyun tarixində verdiyi dini çıxışı zamanı səsləndirib.

Molla Nuri Həmədani isə oxşar mövqedən çıxış edərək Trampın “İslamın müqəddəslərinə qarşı” davrandığını iddia edib və bu kimi hərəkətlərə qarşı “İslam doktrinasına uyğun müqavimət” göstərilməli olduğunu bildirib.

Fitva ilə müşayiət olunan çağırışlar

Hər iki molla, Trampın və digər Qərb liderlərinin şiə dini rəhbərliyini və mərcə institutunu hədəf almasının qlobal müsəlmanlar üçün qəbuledilməz olduğunu vurğulayıb. “Bu, yalnız siyasi yox, həm də dini təhqirdir”, – deyə Şirazi çıxışında qeyd edib.

Mollalar bu fikirləri “fitva” çərçivəsində təqdim ediblər. Qeyd olunur ki, bu fitva, Trampı İslama qarşı düşmənçilikdə günahlandıran və ona qarşı mübarizəni dini vəzifə hesab edən bir mövqedir.