NATO-nun baş katibi Mark Rutte Avropanın və ya Avropa İttifaqının ABŞ-ın iştirakı olmadan öz təhlükəsizliyini təmin edə bilməsi ilə bağlı fikirlərin reallığa uyğun olmadığını bəyan edib.

Baş katib bu açıqlamanı Avropa İttifaqı deputatları qarşısında çıxışı zamanı səsləndirib. Onun sözlərinə görə, Avropanın ABŞ-dan asılı olmadan müstəqil müdafiə sistemi qurması olduqca mürəkkəb və baha başa gələn bir proses olardı.

Mark Rutte bildirib ki, belə bir ssenari nəzərə alınarsa, Aİ ölkələri hərbi xərclərini təxminən ÜDM-in 10 faizinədək artırmalı, milyardlarla avro həcmində investisiya yatırmalı və hətta öz nüvə potensialını formalaşdırmaq məcburiyyətində qala bilərdi.

NATO baş katibi vurğulayıb ki, Avropanın ABŞ-a ehtiyacı olduğu kimi, ABŞ da NATO-ya ehtiyac duyur. Onun fikrincə, bu qarşılıqlı asılılıq transatlantik təhlükəsizlik sisteminin əsasını təşkil edir.

Rutte əlavə edib ki, Vaşinqtonun qlobal prioritetlərində müəyyən dəyişikliklər baş versə belə, ABŞ-ın Avropadakı hərbi mövcudluğu uzunmüddətli perspektivdə güclü olaraq qalacaq. O, NATO-nun Avro-Atlantik məkanın təhlükəsizliyində həlledici rol oynamağa davam edəcəyini də qeyd edib.

Baş katibin bu açıqlamaları Avropada müdafiə xərclərinin artırılması və təhlükəsizlik arxitekturasının gələcəyi ilə bağlı gedən müzakirələr fonunda diqqət çəkir.