Türkiyənin hakim Ədalət və İnkişaf Partiyasının (AK Parti) sözçüsü Ömer Çelik PKK terror təşkilatının bütün qollarının ləğv edilməli olduğunu bəyan edib. Onun sözlərinə görə, Terrorsuz Türkiyə və bölgənin təhlükəsizliyinin təmin olunması üçün PKK-nın Suriya, İraq, İran və Avropadakı qeyri-qanuni strukturları silahı yerə qoymalıdır.

Ömer Çelik bu açıqlamanı mətbuata verdiyi bəyanat zamanı səsləndirib. O bildirib ki, Türkiyə regionda sabitliyin və təhlükəsizliyin təmin olunmasında qətiyyətlidir və terrorla mübarizə bu siyasətin əsas prioritetlərindən biridir.

AK Parti sözçüsü eyni zamanda Suriyadakı vəziyyətə də toxunaraq vurğulayıb ki, Türkiyə etnik və dini mənsubiyyətindən asılı olmayaraq Suriya xalqının yanındadır.

“Şərtlər nə olursa olsun, biz suriyalı kürdlərin, türkmənlərin və ərəblərin yanındayıq”, – deyə Ömer Çelik qeyd edib.

Onun sözlərinə görə, humanitar yardım çərçivəsində ilk mərhələdə Suriyanın Ayn əl-Ərəb bölgəsinə 11 yardım maşını göndərilib. Çelik bildirib ki, Suriyadakı humanitar dəhlizlər vasitəsilə yardımlar fasiləsiz şəkildə davam etdiriləcək.

Türkiyə rəsmiləri qeyd edirlər ki, terrorla mübarizə ilə yanaşı, regionda humanitar böhranın aradan qaldırılması və mülki əhalinin qorunması Ankara üçün mühüm əhəmiyyət daşıyır.