Gürcüstanın xilası yolu Türk birliyinə qoşulmaqdır.
Bunu Gürcüstan Naminə Siyasi Partiyanın sədri Fazil Əliyev bildirib.
O, qeyd edib ki, bütün dünyada və xüsusən də regionda baş verən son hadisələr, geopolitik vəziyyəti kökündən dəyişməklə yeni dünya düzəninin yaranması reallığını ortaya qoydu: "Rusiyanin Ukraynaya qarşı işğalçılıq siyasəti, Krım daxil olmaqla xeyli ərazilərin mənimsənilməsi, Belorusiyada keçirilən qeyri- demokratik seçkilərin faktiki Avropanın lider dövlətləri tərəfindən tanınması və super güclərin Rusiya qarşısında geri çəkilmə məcburiyyəti, Gürcüstanda baş verə biləcək demokratik prosesləri və ərazi bütövlüyünü də ciddi təhlükə altında qoydu. Azərbaycanın İkinci Qarabağ savaşında möhtəşəm qələbəsi, Türkiyənin regionun ən aparıcı oyunçulardan birinə çevrilməsi, Ankarada Türk Dövlətləri Birliyi təşkilatının yaranması anonsunun verilməsi bu təşkilatın faktiki olaraq gələcəkdə regionun hərbi, iqtisadi və mədəni cəhətdən ən güclü bir təşkilata çevriləcəyindən xəbər verir. Rusiya kimi super güc belə bu təskilata qoşulmaq məcburiyyətindədir, əks təqdirdə Rusiyanın tərkibində yaşayan türkdilli millətlərin yeni yaranan təşkilata yönkənməsi Kremlin süqutu ola bilər".
Partiya sədrinin sözlərinə görə, bu deyilənləri nəzərə alaraq və nəticə çıxararaq Gürcüstanımızın təcili surətdə Türk Dövlətləri Birliyinə üzv olmasi və bu istiqamətində lazımi tədbirlər görməyə çağırıram: "Düşünürəm ki, bu yeganə doğru, düzgün çıxış yolu olmaqla bərabər Gürcüstanımızın müstəqil, demokratik və vahid bir dövlət kimi mövcud olub inkişaf etməsinin təminatıdır. Əks təqdirdə Gürcüstan regionda baş verəcək super güclərin maraq dairələrində Ermənistanın taleyini yaşaya bilər".