ABŞ Dövlət Departamenti Konqresə “Şimal axını 2” ilə bağlı iki gəmi və Rusiyaya bağlı bir şirkətin siyahıya salınması təklifini verib.

Bu barədə ABŞ dövlət katibi Entoni Blinkenin bazar ertəsi dərc olunmuş bəyanatında deyilir.

"ABŞ Dövlət Departamenti 2019-cu il Avropanın Enerji Təhlükəsizliyinin Qorunması Aktına (PEESA) əsaslanan hesabatı Konqresə təqdim edib" – bəyanatda deyilir.

Hesabatda “Şimal axını 2” qaz kəməri ilə əlaqəli iki gəmi və Rusiyaya bağlı Transadria Ltd adı çəkilib. Transadria əsaslı sanksiyalara məruz qalacaq və onun Marlin gəmisi müsadirə edilmiş əmlak kimi tanınacaq.

"Bugünkü hesabat ABŞ-ın "Şimal axını 2" boru kəmərinə qarşı çıxması və ABŞ hökumətinin PEESA-nın müddəalarına əməl etməsi ilə bağlı davam edən mövqeyinə uyğundur", - Blinken əlavə edib.

“Administrasiya “Şimal axını 2” qaz kəmərinə, o cümlədən sanksiyaların tətbiqinə qarşı çıxsa da, Almaniya, digər müttəfiqlər və tərəfdaşlarla Ukrayna, NATO ölkələri və Aİ üçün riskləri azaltmaq üçün işləməyə davam edirik. Məqsəd Rusiyanın düşmən hərəkətlərinə, o cümlədən enerji sektoruna qarşı durmaqdır”, - ABŞ dövlət katibi bildirib.

Rusiya tərəfi dəfələrlə vurğulayıb ki, “Şimal axını 2” eksklüziv kommersiya layihəsidir və avropalı tərəfdaşlarla birgə həyata keçirilir. Rusiya prezidentinin mətbuat katibi Dmitri Peskov bir sıra ölkələrin siyasi motivli şərtlərlə qaz kəmərinin taleyini müəyyən etmək cəhdlərindən çaşdığını bildirib. Moskva da enerji resurslarından heç vaxt təzyiq aləti kimi istifadə etmədiyini dəfələrlə bəyan edib.