Rusiyanın Şimali Atlantika Alyansı və Vaşinqtona təhlükəsizlik zəmanəti ilə bağlı təklifləri ölkələr arasında qarşılıqlı etimadın artırılmasına və münaqişə riskinin azaldılmasına kömək edir.

Çin Xarici İşlər Nazirliyinin mətbuat xidmətindən RİA Novosti-yə bildiriblər.

Dekabrın 17-də Rusiya Xarici İşlər Nazirliyi Rusiya ilə ABŞ və NATO arasında təhlükəsizlik təminatlarına dair saziş layihələrini dərc edib. Sənədlər artıq Vaşinqtona və onun müttəfiqlərinə verilib. Layihənin bəndlərindən birində təklif olunur ki, NATO alyansın Ukrayna ərazisinə qədər genişlənməməsinə təminat versin. Rusiya xarici işlər nazirinin müavini Sergey Ryabkovun dediyi kimi, NATO və ABŞ Rusiyanın təhlükəsizlik zəmanəti tələbinə cavab verməsələr, bu, qarşıdurmanın yeni mərhələsinə gətirib çıxara bilər.
"Çin hesab edir ki, hazırkı vəziyyətdə Rusiyanın təklifləri beynəlxalq münasibətlərin əsas normalarına uyğundur, ölkələr arasında qarşılıqlı etimadın artırılmasına, münaqişə riskinin azaldılmasına, qlobal və regional strateji sabitliyin qorunmasına kömək edir", - nazirlik bildirib.
Xarici İşlər Nazirliyi Çinin hər zaman ölkələrin qarşılıqlı hörmət əsasında fikir ayrılıqlarını məsləhətləşmələr yolu ilə düzgün şəkildə həll etməsinin tərəfdarı olduğunu vurğulayıb.