Azərbaycan hökuməti Fransaya məxsus Yeni Kaledoniyanın ardınca 288 kvadratkilometrlik Bonayre adasının “müstəmləkəçilikdən azadlığı”na nail olmaq istəyir.

Qeyd edək ki, Bonayre adası Nederland Krallığının bir hissəsidir və bu balaca adada adambaşına düşən milli gəlir 30 min dollara yaxındır. Azərbaycanda isə adambaşına düşən milli gəlir 5890 dollardır.

Azərbaycandan ən azı 6 dəfə varlı olan bu balaca adanın “müstəmləkəçilikdən əziyyət” çəkdiyini iddia edən Ana Vətən Partiyasının sədri Fəzail Ağamalı deyib ki, Azərbaycan prezidenti İlham Əliyev dünya miqyasında bəşəri dəyərlərə kölgə salan, insan haqlarını boğan halların aradan qaldırılması uğrunda bir lider olaraq öz ölkəsi ilə bərabər mübarizə aparır. Müasir müstəmləkəçiliyə qarşı mübarizənin önündə bu gün Azərbaycan gedir. Bu mərhələ müstəqillik, azadlıq və istiqlal uğrunda mübarizə mərhələsidir. Mən tamamilə əminəm ki, bu proses uğurlu sonluqla bitəcək.