İctimai fəalla bağlı hökm yüngülləşdirilib.

Birinci qrup əlil, hər iki qolu iflic olan ictimai fəal Famil Xəlilova iki il sınaq müddəti olmaqla, 3 il şərti cəza verilib. Fevralın 6-da Bakı Ağır Cinayətlər Məhkəməsində ona hökm oxunub.

Azər Tağıyevin sədrliyilə, Elnur Nuriyev və Kamran Muxtarovdan ibarət hakimlər kollegiyasının çıxardığı hökmə əsasən, Famil Xəlilov Cinayöt Məcəlləsinin 234.1-1 (satış məqsədi oımadan külli miqdarda narkotik daşıma) maddəsilə təqsirli bilinib. 2024-cü il mayın 2-də tutulanda onun cibindən 13 qram metamfetamin (“şüşə”, “patı”) tapıldığı iddia edilir.

O, Cinayət Məcəlləsinin 234.4.3 (satış məqsədilə külli miqdarda narkotik saxlama) maddəsilə ittiham olunurdu. Məhkəmə hökmündə ittiham yüngülləşdirilib, satış məsələsi çıxarılıb.

Fevralın 6-da hökm oxunmamışdan əvvəl prokuror da çıxışında Famil Xəlilova şərti cəza verilməsini təklif edib.

Onun vəkili Fariz Namazlı və özü isə bəraət istəyib. Onlar bildirib ki, narkotik ittihamı əsassızdır, onun təqsiri yoxdur. Famil Xəlilovun sözlərinə görə, onu evindən götürüb aparıblar və həmin vaxt üstündə narkotik olmayıb. Küçədə tutulması barədə yazılanlar yalandır.

Qısa müşavirədən sonra hakimlər geri qayıdaraq, onun haqqında şərti cəza hökmünü elan edib.

Famil Xəlilov hökmdən apelyasiya şikayəti verəcək.

İttihama əsasən, 1990-cı il təvəllüdlü Famil Xəlilov mayın 2-də Abdullayev küçəsində gedəndə Binəqədi polisinin əməkdaşları onu şübhəli şəxs kimi saxlayıb. Onu bölməyə gətirib, üstünə baxış keçirəndə şortikinin cibindən 13,736 qram metamfetamin çıxıb.

Famil Xəlilov isə bildirib ki, ittihamda yazılanların hamısı başdan-ayağa yalandır:

“Mən təqsirləndirilən şəxs deyiləm, şərlənən şəxsəm”.

İctimai fəal əlavə edib ki, həbsinin səbəbi ölkədəki ədalətsizliklər, hakimiyyətin özbaşınalıqları barədə sosial şəbəkələrdəki çıxışları, yazılarıdır. Buna görə onu narkotiklə şərləyiblər.

“Həmin yazıları kompüterdə ayaq barmaqlarımla yazırdım. Yəni məni ayaq barmaqlarımla yazdığım yazılara görə şərləyib bura salıblar”, – Famil Xəlilov bildirib.

İsveçdən ailəsilə birlikdə sığınacaq istəsə də, imtina cavabı alaraq, 2023-cü ilin yayında Azərbaycana deportasiya edilən və 2024-cü il mayın 2-də həbs edilən Famil Xəlilov dekabrın 3-də ev dustaqlığına buraxılıb.