Daxili İşlər Nazirliyinin Baş Dövlət Yol Polisi İdarəsi (BDYPİ) paytaxtda baş verən yol-nəqliyyat hadisələri ilə bağlı statistik məlumat açıqlayıb.

Qurumdan verilən məlumata görə, piyadaların iştirakı ilə qeydə alınan qəzalar təkcə fərdi itkilərlə deyil, bütövlükdə cəmiyyət üçün ciddi sosial və iqtisadi fəsadlarla nəticələnir.

Bildirilib ki, 2025-ci ilin 9 ayı ərzində respublika üzrə qeydə alınan ümumi yol qəzalarının 39,1 faizi, Bakı şəhəri üzrə isə 59,6 faizi məhz piyadaların vurulması ilə nəticələnib.

Məlumatda qeyd olunur ki, bu göstəricilərin formalaşmasında piyadaların məsuliyyətsiz davranışı az rol oynamayıb:

“Təəssüf ki, bir çox hallarda piyadalar məhz piyada keçidlərinin yaxınlığında vurulur. Bu isə yol hərəkəti prosesində şəxsi məsuliyyət məsələsinin aktuallığını bir daha gündəmə gətirir”.

BDYPİ piyadalara yolu yalnız müəyyən olunmuş yerlərdən keçməyi, gecə vaxtı daha ehtiyatlı olmağı, mobil telefon və qulaqcıqdan istifadə etməməyi, həmçinin qəfil avtomobil yoluna çıxmamağı tövsiyə edib.

Qurumun müraciətində vurğulanır ki, yol hərəkətində hər bir şəxsin məsuliyyətli davranışı insan həyatını xilas edə və yol-nəqliyyat hadisələrinin sayını azalda bilər.