“Sputnik Azərbaycan” informasiya agentliyinin icraçı direktoru İqor Kartavıx azad edilib və Rusiyaya yola salınıb.

Bu barədə Rusiya Xarici İşlər Nazirliyinin (XİN) rəsmi nümayəndəsi Mariya Zaxarova məlumat verib.

“Kartavıx azad olunub və Rusiyaya uçub”, – Zaxarova oktyabrın 19-da jurnalistlərə açıqlamasında deyib.

Xatırladaq ki, Azərbaycan hüquq-mühafizə orqanları 2025-ci ilin iyun ayının sonunda “Sputnik Azərbaycan”ın bir neçə əməkdaşını, o cümlədən Kartavıxı saxlamışdı. Daxili İşlər Nazirliyinin məlumatına görə, onlara qarşı dələduzluq, qanunsuz sahibkarlıq və çirkli pulların yuyulması maddələri üzrə cinayət işi açılmışdı.

Saxlanmalar Rusiyanın Yekaterinburq şəhərində azərbaycanlılara qarşı törədilmiş qətl və sui-qəsd hadisələrinə dair aparılan istintaq reydlərindən sonra baş vermişdi.

Rusiya prezidenti Vladimir Putin oktyabrın 9-da Düşənbədə Azərbaycan prezidenti İlham Əliyevlə görüş zamanı məsələyə toxunmuş və iki ölkə arasında yaranmış gərginliyin aradan qaldırılması istiqamətində razılıqlar əldə edilmişdi.

Görüşdən bir gün sonra, oktyabrın 10-da, “Sputnik Azərbaycan” redaksiyasının rəhbəri İqor Kartavıx barəsində seçilmiş həbs qətimkan tədbiri ev dustaqlığı ilə əvəz olunmuşdu.

Mariya Zaxarovanın açıqlamasına əsasən, İqor Kartavıx artıq Rusiyaya qayıdıb.