“Abzas Media”nın həbsdə olan baş redaktoru Sevinc Vaqifqızının ailəsi onunla son görüş zamanı müəssisə əməkdaşlarının təhqiramiz davranışına məruz qaldığını bildirib.

Ailənin məlumatına görə, oktyabrın 18-də Lənkərandakı Penitensiar Kompleksdə keçirilən görüş zamanı jurnalistin anası və bacısı zorakı və alçaldıcı rəftarla üzləşiblər. Görüşdən əvvəl müəssisə əməkdaşları Ofeliya Məhərrəmova və qızını xüsusi otağa apararaq onları zorla yoxlamağa cəhd ediblər.

Ofeliya Məhərrəmova ürəyində aparat olduğunu və ehtiyatla davranılmasını xahiş etsə də, əməkdaşlar onlardan və qızından ayaqqabılarını çıxarmağı tələb ediblər. Jurnalistin bacısı bildirib ki, əməliyyatlı ayağı səbəbilə bu tələbi yerinə yetirə bilməyib və xüsusi aparatla yoxlanılmalarını tələb edib.

Ailənin sözlərinə görə, onlar əvvəl aparatda yoxlanılandan sonra heç bir qadağan olunmuş əşya aşkar edilməyib, lakin görüşdən çıxarkən yenidən zorla yoxlanılıblar. Bu dəfə əməkdaşlar jurnalistin bacısının ayaqqabılarını çıxarıb içliyini söküblər. Bacı əlavə edib ki, yoxlama zamanı nəzarətçi kobud davranıb.

Görüş zamanı jurnalistin ailəsi ilə konfidensial ünsiyyət hüququnun pozulduğu da bildirilir. Ailənin sözlərinə görə, görüş cəmi bir saat davam edib və otaqda fasiləsiz nəzarətçi iştirak edib. Sevinc Vaqifqızı isə bu vəziyyətə etiraz edərək ailəsi ilə sərbəst ünsiyyət qura bilmədiyini qeyd edib. Nəzarətçi əməkdaş isə bunun “əmr əsasında” həyata keçirildiyini bildirib.

Sentyabrın 25-də Sevinc Vaqifqızı, Nərgiz Absalamova və Elnarə Qasımova Bakı İstintaq Təcridxanasından Lənkərandakı Penitensiar Kompleksə köçürülüblər. Ailə bu köçürülmənin görüş imkanlarını daha da məhdudlaşdırdığını və jurnalistlərə qarşı təzyiq hesab edildiyini vurğulayıb.

Xatırladaq ki, iyunun 20-də Bakı Ağır Cinayətlər Məhkəməsinin hökmü ilə “Abzas Media işi” üzrə Sevinc Vaqifqızı, Ülvi Həsənli, Hafiz Babalı və Fərid Mehralızadə 9 il, Nərgiz Absalamova və Elnarə Qasımova 8 il, Məhəmməd Kekalov isə 7 il 6 ay azadlıqdan məhrum olunublar.