Sabiq milli təhlükəsizlik naziri Eldar Mahmudovun həbs ediləcəyi ilə bağlı yayılan məlumatlara onun vəkili münasibət bildirib.

Eldar Mahmudovun vəkili Cavid Rzazadə bildirib ki, müdafiə etdiyi şəxs barəsində hər hansı araşdırma və ya cinayət təqibi aparılması barədə onlara rəsmi məlumat verilməyib.

“Son günlər mediada yayılan xəbərlərlə biz də tanışıq. Lakin prokurorluqdan bizə belə bir məlumat daxil olmayıb. Mən Eldar Mahmudovun vəkiliyəm, əgər o, hər hansı istintaq orqanında dindirilsəydi, bu barədə mütləq xəbərim olardı,” – deyə vəkil qeyd edib.

Cavid Rzazadə, həmçinin keçmiş MTN rəhbərinin adının Ramiz Mehdiyevlə yanaşı hallandırılması barədə suala cavab verməkdən imtina edib.

Xatırladaq ki, İspaniyanın “Diario de Mallorca” nəşri Azərbaycanın Baş Prokurorluğunun Palma şəhər məhkəməsi və Balear adalarının Korrupsiyaya qarşı Prokurorluğuna göndərdiyi məktuba istinadla yazıb ki, Mahmudovlar ailəsi ilə bağlı məlumatlar İspaniya tərəfinə təqdim edilib. Məktubda bildirilir ki, hazırda sabiq nazir Eldar Mahmudov və bir sıra digər şəxslər barəsində ayrıca cinayət işi aparılır.

Həmin sənədlərdə Mahmudov ailəsinin Azərbaycanda və Avropanın bir sıra ölkələrində – İspaniya, Almaniya, Böyük Britaniya, Lüksemburq və İtaliyada – 100 milyon avrodan artıq dəyəri olan əmlaklara sahib olduğu qeyd olunub.

Azərbaycan Baş Prokurorluğu isə mövzu ilə bağlı hələlik heç bir açıqlama verməyib.