Hazırda aztəminatlı ailələrdən olan 179 min 618 uşağa ünvanlı dövlət sosial yardımı ödənişi verilir. Bu barədə Milli Məclisin Ailə, qadın və uşaq məsələləri komitəsində keçirilən iclasda “Uşaq hüquqları haqqında” yeni qanun layihəsinin müzakirəsi zamanı Əmək və Əhalinin Sosial Müdafiəsi Nazirliyinin Sosial təminat siyasəti şöbəsinin müdiri Babək Hüseynov məlumat verib.

Nazirlik rəsmisi bildirib ki, hazırlanmış yeni qanun layihəsində uşağa yanaşma konseptual olaraq dəyişdirilib. Onun sözlərinə görə, uşaq artıq yalnız sosial yardım alan şəxs kimi deyil, sosial təminat hüququna malik müstəqil hüquqi subyekt kimi tanınır. Bu yanaşma uşaqların hüquqlarının daha geniş şəkildə qorunmasına və sosial müdafiə mexanizmlərinin gücləndirilməsinə xidmət edir.

Babək Hüseynov qeyd edib ki, həyata keçirilən reinteqrasiya tədbirləri nəticəsində 2025-ci il ərzində 275 uşağın sosial müəssisələrə düşməsinin qarşısı alınıb, 176 uşaq isə müəssisələrdən ailələrinə qaytarılıb. Bu tədbirlər ailə mühitinin qorunması və uşaqların sağlam inkişafının təmin edilməsi baxımından mühüm əhəmiyyət daşıyır.

Nazirlik rəsmisinin verdiyi məlumata əsasən, 1 yanvar 2026-cı il tarixinə əlilliyi olan 44 200 uşaq, ailə başçısını itirmiş 67 000 uşaq, beşdən çox uşağı olan qadınların 13 200 övladı, aztəminatlı ailələrin 1 yaşınadək 3 200 uşağı, müddətli həqiqi hərbi xidmət hərbi qulluqçularının 647 uşağı sosial ödənişlərlə təmin olunur. Eyni zamanda, 42 övladlığa götürülmüş və 47 himayədar ailəyə verilmiş uşaq da dövlət tərəfindən sosial dəstək alır. Ümumilikdə isə 128 mindən çox uşaq Əmək və Əhalinin Sosial Müdafiəsi Nazirliyi tərəfindən müxtəlif növ sosial ödənişlərlə əhatə olunub.

Qeyd edək ki, hazırda müddətli həqiqi hərbi xidmət hərbi qulluqçularının uşaqlarına hər uşaq üçün aylıq 140 manat məbləğində müavinət ödənilir.