Xuliqanlıq və dələduzluqda ittiham olunan hüquq müdafiəçisi Rüfət Səfərovun cinayət işi üzrə növbəti məhkəmə prosesi keçirilib. Bakı Ağır Cinayətlər Məhkəməsində, hakim Aygün Qurbanovanın sədrliyi ilə baş tutan iclasda tərəflər arasında gərgin mübahisə yaşanıb.

Prosesdə təqsirləndirilən şəxsin vəkillərinin sualları ilə zərərçəkən Natiq İmamquliyevin dindirilməsi davam etdirilib. Natiq İmamquliyev ifadəsində Rüfət Səfərov tərəfindən döyüldüyünü və bu zaman çənəsinin qırıldığını iddia etsə də, xəsarətlə bağlı hansı tibb müəssisəsində müalicə olunduğunu açıqlamayıb.

Məhkəmə zamanı təqsirləndirilənin vəkilləri zərərçəkənin Rüfət Səfərova verdiyi iddia olunan 60 min manatın mənbəyi ilə bağlı sual ünvanlayıb. Lakin dövlət ittihamçısının təklifi ilə bu sualın çıxarılması Rüfət Səfərovun etirazına səbəb olub. Nəticədə təqsirləndirilən şəxs ilə prokuror arasında kəskin mübahisə yaranıb.

Hakimin dəfələrlə etdiyi xəbərdarlıqlara baxmayaraq, tərəflər sakitləşmədiyindən məhkəmə prosesi vaxtından əvvəl dayandırılıb və qeyri-müəyyən vaxta təxirə salınıb.

Qeyd edək ki, 2024-cü il dekabrın 3-də Natiq İmamquliyev Rüfət Səfərov barəsində Binəqədi Rayon Polis İdarəsinin 5-ci polis bölməsinə müraciət edib. Şikayətdə o, 60 min manat pulunun Rüfət Səfərov tərəfindən ələ keçirildiyini, eləcə də aralarında baş verən insident zamanı xəsarət aldığını bildirib. Rüfət Səfərov isə ittihamları qəbul etməyərək, Natiq İmamquliyevi ilk dəfə gördüyünü və tanımadığını deyib.

Faktla bağlı Cinayət Məcəlləsinin
• 178.3.2-ci maddəsi (külli miqdarda ziyan vurmaqla dələduzluq),
• 127.2.3-cü maddəsi (xuliqanlıq niyyəti ilə qəsdən sağlamlığa az ağır zərər vurma),
• 221.1-ci maddəsi (xuliqanlıq)

ilə cinayət işi başlanıb.

Məhkəmənin növbəti iclasının vaxtı əlavə olaraq açıqlanacaq.