Almaniya kansleri Fridrix Merts Ukraynanın 2027-ci ildə Avropa İttifaqına üzv ola bilməyəcəyini açıqlayıb.

Məlumata görə, ABŞ tərəfi Ukraynanın mümkün sülh sazişinə razılıq verməsi halında ona təkcə təhlükəsizlik zəmanətləri deyil, həm də 1 yanvar 2027-ci il tarixindən Aİ-yə üzvlük perspektivi vəd edir. Kiyev də bu məsələni danışıqlarda əsas tələblərdən biri kimi irəli sürür.

Lakin Almaniya kansleri bu ehtimalı “qeyri-mümkün” adlandırıb. O, bu barədə koalisiya komitəsinin iclasından sonra jurnalistlərə verdiyi açıqlamada danışıb.

Fridrix Merts xatırladıb ki, Avropa İttifaqına üzv olmaq istəyən hər bir ölkə Kopenhagen meyarlarına tam cavab verməlidir və bu proses adətən bir neçə il vaxt aparır. Kanslerin sözlərinə görə, Ukraynanın bu qədər qısa müddətdə Aİ-yə qəbul olunması real deyil.

Qeyd edək ki, Ukraynanın Aİ-yə üzvlüyü məsələsi Rusiya-Ukrayna müharibəsi fonunda Qərb ölkələri arasında geniş müzakirə mövzusu olaraq qalır.