“Qarabağ”ın braziliyalı futbolçusu Mateus Silva Çempionlar Liqasında uğurlu çıxış edəcəklərinə inandıqlarını bildirib.

Sağ cinah müdafiəçisi bu barədə ölkəsinin mətbuatına açıqlamasında deyib ki, Çempionlar Liqasında mübarizə aparmaq hər bir futbolçunun arzusudur:

“Belə bir turnirin əsas mərhələsində çıxış etmək mənim üçün çox xoşdur. Bu, hər bir futbolçunun arzusudur. Bu səviyyədəki oyunlarda komandama kömək etmək xüsusi hissdir. Komandamızda çox güclü birlik var və biz Çempionlar Liqasında yeni tarix yaza biləcəyimizə inanırıq. İndi əsas məqsəd emosiyalara qapılmamaq və bütün diqqəti ‘Liverpul’la oyuna yönəltməkdir”.

Qeyd edək ki, Mateus Silva Çempionlar Liqasında ən çox qayda pozuntusuna məruz qalan futbolçudur (23 dəfə). O, eyni zamanda ən çox ikili mübarizə qazanan oyunçular sırasında yer alır (56 dəfə).

Xatırladaq ki, “Liverpul” – “Qarabağ” qarşılaşması yanvarın 28-dən 29-na keçən gecə keçiriləcək. Oyun Bakı vaxtı ilə saat 00:00-da başlayacaq.