“Çempionlar Liqasının pley-off mərhələsinə vəsiqə qazanmaqla Azərbaycan futbolu üçün çox önəmli uğura imza atdıq”.

Bu sözləri “Qarabağ”ın baş məşqçisi Qurban Qurbanov komandanın Çempionlar Liqasındakı çıxışından sonra Heydər Əliyev Beynəlxalq Aeroportunda təşkil olunan qarşılanma mərasimi zamanı jurnalistlərə açıqlamasında deyib.

Mütəxəssis bu nəticənin böyük zəhmət hesabına əldə olunduğunu vurğulayıb:
“İkinci dəfə idi ki, turnirin əsas mərhələsində çıxış edirdik. Bu il oyunların sayı daha çox oldu. Yaxşı nəticələr əldə etdik. Bu, futbolumuz üçün çox vacib idi. Xalqımızı təbrik edirəm”.

Qurban Qurbanov növbəti mərhələdə mümkün rəqiblər – “Nyukasl” və PSJ ilə bağlı da fikirlərini bölüşüb:
“Əsas məqsəd maksimum nəticə göstərmək olacaq və bütün klublar bunun üçün çalışacaq. Bu mərhələdə rəqibləri bir-birindən ayırmaq çətindir. Bəlkə bu gün PSJ daha çətin rəqib hesab edilə bilər. Amma İngiltərə klublarının da gücü hər kəsə bəllidir. Hansı komanda daha yaxşı idman formasında olacaqsa, yüksək nəticə əldə edəcək”.

Qeyd edək ki, “Qarabağ” liqa mərhələsinin son turunda İngiltərədə “Liverpul”a 0:6 hesabı ilə məğlub olub. Böyükhesablı məğlubiyyətə baxmayaraq, Ağdam təmsilçisi turnir cədvəlini 10 xalla 22-ci pillədə tamamlayaraq növbəti mərhələyə yüksəlib.

Bununla da “köhlən atlar” Çempionlar Liqasının pley-off mərhələsinə vəsiqə qazanan ilk Azərbaycan klubu kimi tarixə düşüb.