Azərbaycan elmi və siyasi elitasının nüfuzlu nümayəndələri olan bəzi akademiklərin maddi imkanları və gəlir mənbələri ilə bağlı sosial şəbəkələrdə və media orqanlarında müzakirələr səngimir. İctimaiyyət arasında geniş rezonans doğuran bu müzakirələr əsasən akademik Abel Məhərrəmovun jurnalist sualına verdiyi cavabla başlayıb.

Keçmiş BDU rektoru, akademik Abel Məhərrəmov bir müsahibəsində aldığı maaş və təqaüdün onu qane etdiyini bildirib. O, qeyd edib ki, iki çağırış deputat olduğu üçün deputat təqaüdü alır, həmçinin Azərbaycan Milli Elmlər Akademiyasında və Bakı Dövlət Universitetində vəzifələr tutur, Rusiya Elmlər Akademiyası ilə də əməkdaşlıq çərçivəsində müəyyən dəstəklər alır. “Sosial durumumdan narazı deyiləm. Arzu edirəm ki, hamının vəziyyəti bizim kimi yaxşı olsun,” – deyə o bildirib.

Məhərrəmovun bu cavabı sosial mediada ironik və tənqidi şərhlərlə qarşılanıb. Sosial şəbəkələrdə istifadəçilər onun adına bağlı olan obyektləri – o cümlədən “Mona Liza” şadlıq sarayı, Nabrandakı istirahət mərkəzi, Qızıl Qazmadakı restoranlar və çoxsaylı daşınmaz əmlak barədə müxtəlif iddialar irəli sürüblər. Məhərrəmov bu iddialara rəsmi münasibət bildirməyib.

Müzakirələr akademik Əhliman Əmiraslanovun adı ilə də davam edib. Hazırda Milli Məclisin Səhiyyə Komitəsinin sədri olan Əmiraslanov uzun illər Tibb Universitetinə rəhbərlik edib, eyni zamanda Onkologiya Klinikasının direktoru kimi fəaliyyət göstərib. İddialara görə, onun da geniş biznes əlaqələri və əmlakları mövcuddur. O, mediada və ya ictimai müzakirələrdə bu barədə açıqlama verməyib.

AMEA-nın hazırkı prezidenti İsa Həbibbəylinin də gəlir mənbələri müzakirə olunub. Deputat təqaüdü, akademik maaşı və digər vəzifələrindən aldığı vəsaitlərlə yanaşı, ona məxsus olduğu iddia edilən “Karvan” şadlıq sarayı ilə bağlı da fikirlər irəli sürülüb. Oğlu, Naxçıvan Gömrük Komitəsinin keçmiş rəhbəri Səhət Həbibbəylinin məhkəmədə verdiyi ifadə də sosial mediada geniş yayılıb. Həmin ifadədə rüsumlardan qeyri-rəsmi şəkildə rəhbərliyə iri məbləğlər ötürüldüyü qeyd olunub. Həbibbəylilər bu məsələyə də hələlik münasibət bildirməyiblər.

Bütün bu şəxslər uzun illər dövlət qurumlarında və elm sahəsində rəhbər vəzifələrdə çalışıblar. Sosial şəbəkələrdə və mediada səsləndirilən fikirlər ictimai maraq doğursa da, onların dəqiqliyi və hüquqi əsası rəsmi təsdiqini tapmayıb. İddialarla bağlı hər hansı araşdırma aparılıb-aparılmadığı barədə də ictimaiyyətə açıq informasiya verilməyib.