Səudiyyə Ərəbistanında tanınmış jurnalist Türki əl-Cəsiri edam edilib. Bu barədə məlumatlar hüquq müdafiəçiləri və mühacirətdə olan ərəb mediası tərəfindən yayılıb.

Türki əl-Cəsirinin rejimə tənqidi yanaşdığına və ifadə azadlığını müdafiə etdiyinə görə uzun müddət təzyiqlərə məruz qaldığı, sonda isə ölüm cəzasına məhkum olunduğu bildirilir. O, sosial mediada insan haqları pozuntuları, korrupsiya halları və ifadə azadlığına məhdudiyyətlər barədə paylaşımlar edirdi.

Məlumatlara görə, onun edamı məxfi şəkildə həyata keçirilib, ailəsinə cənazəsi təhvil verilməyib.

Bu hadisə Səudiyyə rejiminin tənqidçi səslərə qarşı sərt münasibətini bir daha gündəmə gətirib. Beynəlxalq insan haqları təşkilatları bu addımı ifadə azadlığına zidd və qanunsuz adlandıraraq Səudiyyə Ərəbistanına təzyiqlərin artırılması çağırışları ediblər.

Rəsmi Riyad hələlik məsələ ilə bağlı heç bir açıqlama verməyib.