USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
16 il həbsi istənilən fəal etiraz olaraq intihara cəhd edib
Dövlətə xəyanətdə ittiham olunan ictimai fəal Bəhruz Səmədov dövlət ittihamçısının onun üçün 16 il həbs cəzası tələb etməsinə etiraz əlaməti olaraq intihara cəhd edib. Bu barədə onun yaxınları məlumat verib.
Bildirilir ki, Səmədov saxlandığı 1 saylı Bakı İstintaq Təcridxanasında kamerada özünü asmağa cəhd edib. Ancaq kamera yoldaşının vaxtında müdaxiləsi nəticəsində onun həyatını xilas etmək mümkün olub.
Fəalın ailə üzvlərinin sözlərinə görə, Bəhruz Səmədov artıq 3 gündür ki, ölüm aclığı aksiyasına başlayıb və təcridxanaya göndərilən ərzaqdan da imtina edib.
İyunun 21-də onun nənəsi Zibeydə Osmanova nəvəsi ilə görüşüb. Görüşdən sonra ailə üzvləri təcridxana rəisi Elnur İsmayılovun qəbuluna çağırılıb. Osmanovanın sözlərinə görə, rəis Bəhruzu aclığı dayandırmağa və bu cür addımlardan çəkinməyə çağırıb.
“Rəis Bəhruzu başa salmağa çalışdı, dedi ki, belə şeylər etmə. Amma Bəhruz dedi ki, mən günahsızam. Niyə mənə 16 il cəza verirsiniz? Ona görə də aclığı dayandırmayacağam”, – deyə Osmanova bildirib.
Bəhruz Səmədov 2024-cü il avqustun 21-də Dövlət Təhlükəsizliyi Xidmətinin əməkdaşları tərəfindən saxlanılıb. Onun evində axtarış aparılıb, kompüteri və şəxsi əşyaları müsadirə olunub. Ona qarşı Cinayət Məcəlləsinin 274-cü maddəsi (dövlətə xəyanət) ilə cinayət işi açılıb.
İyunun 20-də keçirilən məhkəmə iclasında dövlət ittihamçısı Səmədovun təqsirinin sübuta yetirildiyini bildirib və onun 16 il müddətinə azadlıqdan məhrum edilməsini tələb edib.
Fəalın vəkili isə ittihamların əsassız olduğunu və müdafiə tərəfinin apellyasiya şikayəti verməyə hazırlaşdığını bəyan edib.
