USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Avropa Parlamenti: “Azərbaycanda siyasi motivli şokedici sərt həbs cəzalarından dəhşətə gəlmişik”
Avropa Parlamenti Azərbaycanda jurnalistlərə, tədqiqatçılara və ictimai fəallara qarşı son günlərdə çıxarılan sərt həbs cəzələrini kəskin tənqid edib.
Parlamentin İnsan Hüquqları Alt Komitəsinin sədri Munir Saturi, Cənubi Qafqaz üzrə nümayəndə heyətinin rəhbəri Nils Uşakovs və Azərbaycan üzrə daimi məruzəçi Dan Barna tərəfindən yayımlanan birgə bəyanatda deyilir:
“Azərbaycanda siyasi motivli işlər üzrə jurnalist, tədqiqatçı və fəallara qarşı tətbiq edilən şokedici dərəcədə sərt həbs cəzalarından dəhşətə gəlmişik. Onların və digər siyasi məhbusların heç biri ümumiyyətlə mühakimə olunmamalı idi. Lakin bu qeyri-adi ağır cəzalar Azərbaycanda rejim tənqidçilərinə qarşı amansız repressiyaların daha bir mərhələyə keçdiyini göstərir.”
Bəyanatda Avropa İttifaqının Qlobal İnsan Hüquqları Sanksiyaları Rejimi çərçivəsində bu cəza qərarlarında məsuliyyət daşıyan Azərbaycan rəsmilərinə qarşı sanksiyalar tətbiq olunması təklif edilir.
Avropa Parlamenti eyni zamanda Avropa Xarici Fəaliyyət Xidmətini və Aİ-nin Ali Nümayəndəsini Azərbaycandakı rejimi “daha da cəsarətləndirə biləcək” istənilən əməkdaşlıq və güzəşt addımlarından çəkinməyə çağırır.
Bu bəyanat “AbzasMedia işi” çərçivəsində bir sıra tanınmış jurnalistlərin və tədqiqatçıların 7 ildən 9 ilədək azadlıqdan məhrum edilməsi fonunda səsləndirilib. Yerli və beynəlxalq hüquq-müdafiə təşkilatları da bu həbsləri siyasi motivli hesab edir və jurnalistlərin dərhal azadlığa buraxılmasını tələb edirlər.
