Avropa Parlamentinin Fransa, Latviya və Rumıniyadan olan deputatları Azərbaycanda insan haqları və söz azadlığı ilə bağlı vəziyyətin kəskin şəkildə pisləşdiyini bildirərək, ölkə rəhbərliyində yüksək vəzifələr tutan məmurlara qarşı sanksiyalar tətbiq olunmasına çağırıblar.

Rumıniyadan olan deputat və eyni zamanda Avropa Parlamentinin Azərbaycan üzrə daimi məruzəçisi Dan Barna bəyan edib ki, Azərbaycanda müstəqil jurnalistlər və tədqiqatçılar “olduqca ağır və şokedici cəzalarla” üzləşirlər və son illər repressiyaların miqyası daha da genişlənib. Onun sözlərinə görə, bu həbslər ölkədə azad sözə və ictimai nəzarətə açıq təhdiddir.

Latviyalı deputat, Riqa şəhərinin keçmiş meri və hazırda Avropa Parlamentində fəaliyyət göstərən Nils Uşakovs da Barna ilə həmfikir olduğunu bildirib. O, vurğulayıb ki, bu cür siyasi motivli həbslərdə və təqiblərdə rolu olan Azərbaycan rəsmilərinə sanksiya tətbiq olunmalıdır:

“Siyasi qərarların məsuliyyətini daşıyan şəxslər konkret şəkildə cəzalandırılmalıdır. Susmaq artıq mümkün deyil”.

Fransalı deputat və Avropa Parlamentinin İnsan Hüquqları Alt Komitəsinin rəhbəri Mounir Satouri isə həmkarlarının təşəbbüsünə dəstək verərək, bu kimi repressiv hərəkətlərin beynəlxalq ictimaiyyət tərəfindən qətiyyətlə cavablandırılmasının vacibliyini qeyd edib.

Üç deputatın hazırladığı birgə bəyanatda, Avropa Parlamentinin rəhbərliyinə və Avropa Komissiyasının başçısı Ursula von der Leyenə müraciət yer alıb. Bəyanatda deyilir:

“Avropa Parlamenti dəfələrlə bəyan edib ki, Avropa İttifaqı ilə Azərbaycan arasında gələcək hər hansı tərəfdaşlıq sazişinin şərtləri arasında bütün siyasi məhbusların azad edilməsi və ölkədə insan hüquqları ilə bağlı vəziyyətin əhəmiyyətli dərəcədə yaxşılaşdırılması əsas tələblərdən olmalıdır”.

Bu çağırış, son həftələrdə “AbzasMedia” işi çərçivəsində bir sıra tanınmış jurnalist və vətəndaş cəmiyyəti fəallarına 7 ildən 9 ilədək azadlıqdan məhrumetmə cəzaları verilməsinə reaksiyanın davamı olaraq yayılıb. Yerli və beynəlxalq hüquq-müdafiə təşkilatları bu həbsləri siyasi motivli hesab edir və Avropa İttifaqını konkret addımlar atmağa səsləyirlər.