İyunun 13-də Norveçin paytaxtı Oslo şəhərində yerləşən Norveç Parlamenti qarşısında siyasi məhbuslara dəstək məqsədilə etiraz aksiyası keçirilib. Aksiya İnsan Haqları Evi Şəbəkəsinin (Human Rights House Network) təşəbbüsü ilə təşkil olunub. Tədbirin əsas məqsədi Qafqaz və Şərqi Avropa regionlarında artan siyasi repressiyalara diqqət çəkmək və bu ölkələrdə ədalətsiz şəkildə həbs olunan fəallara, jurnalistlərə və dissidentlərə beynəlxalq dəstəyin gücləndirilməsinə çağırış etmək olub.

Aksiyada Azərbaycandan, Gürcüstandan, Belarudan, Rusiyadan və digər ölkələrdən olan hüquq müdafiəçiləri, diaspor nümayəndələri və insan haqları təşkilatlarının üzvləri iştirak ediblər. Etirazçılar üzərində müxtəlif ölkələrdən olan siyasi məhbusların şəkilləri, adları və haqlarında qısa məlumatların yer aldığı plakatlar və pankartlar daşıyıblar. Onlar beynəlxalq ictimaiyyəti bu şəxslərin azadlığı üçün daha konkret və effektiv addımlar atmağa çağırıblar.

Human Rights House Foundation (HRHF) tərəfindən sosial media üzərindən yayımlanan məlumatda bildirilir ki, siyasi səbəblərlə həbs olunan şəxslərin sayı son illərdə xüsusilə Azərbaycan, Belarus və Rusiya kimi ölkələrdə artmaqdadır. Açıq şəkildə bildirilib ki, bu həbslər ifadə və toplaşma azadlığına qarşı hücum kimi qiymətləndirilir və beynəlxalq hüququn pozulmasıdır.

HRHF təşkilatının nümayəndələri qeyd ediblər ki, bu aksiyalar yalnız həmrəylik nümayişi deyil, həm də siyasi məhbuslara və onların ailələrinə beynəlxalq diqqətin yönəldilməsi baxımından önəmlidir. Aksiya zamanı oxunan bəyanatda Norveç və digər demokratik ölkələrin hökumətlərinə çağırış edilib ki, insan hüquqlarının pozulmasına görə məsuliyyət daşıyan rejimlərə qarşı sanksiyalar tətbiq etsinlər, siyasi məhbusların azadlığa buraxılması üçün təzyiqləri gücləndirsinlər.

Xatırladaq ki, İnsan Haqları Evi Şəbəkəsi dünyanın müxtəlif ölkələrində yerləşən və insan haqlarının müdafiəsi üçün fəaliyyət göstərən müstəqil təşkilatları bir araya gətirən beynəlxalq bir qurumdur. Şəbəkə illərdir ki, Avropa və Qafqaz bölgəsində siyasi repressiyalara məruz qalan şəxslərin müdafiəsi istiqamətində aktiv fəaliyyət göstərir.

Aksiyanın sonunda iştirakçılar siyasi məhbusların azad olunması üçün səylərin davam etdiriləcəyini və beynəlxalq ictimaiyyətin bu məsələdə susmamalı olduğunu bəyan ediblər.