30 iyun 2025-ci il tarixində Bakı Ağır Cinayətlər Məhkəməsində “Toplum TV işi” üzrə növbəti məhkəmə prosesi keçirilib. Hakim Elnur Nuriyevin sədrliyi ilə baş tutan iclasda təqsirləndirilən şəxslər məhkəməyə müxtəlif vəsatətlərlə müraciət edib, ittihamları təkzib edən və müdafiə xarakterli çıxışlarla yadda qalıblar.

Hakimin dəyişdirilməsi tələb olundu

İlk olaraq jurnalist Fərid İsmayılov vəsatət qaldıraraq, hakim Elnur Nuriyevin əvvəlki siyasi işlərdə ədalətsiz və sifarişli qərarlar verdiyini əsas gətirərək, onun işdən kənarlaşdırılmasını istəyib. Lakin vəsatət təmin olunmayıb.

Ələsgər Məmmədli: “Ziyalılıq ittiham olunur”

Toplum TV-nin həmtəsisçisi Ələsgər Məmmədli çıxışında bildirib ki, 2024-cü ilin martında həbsindən sonra Vergilər Nazirliyi ondan gəlirlərini bəyan etməsini tələb edib, lakin bu hüquqi prosesi başa çatdırmaq üçün notariat icazəsi verilməyib.

“Mən BDU-da təmənnasız dərs deyib maaşımı bağışlamışam. İndi məni tamah məqsədilə cinayət törətməkdə ittiham edirlər”, – deyə Məmmədli bildirib.

O, həmçinin 12 yaşında olan İlkin Əmrahovun da mütəşəkkil dəstə üzvü kimi təqdim edilməsinin absurdluluğuna diqqət çəkib.

Ruslan İzzətli: “Bizim günahımız ədalət istəməyimizdir”

III Respublika Platformasının qurucu heyət üzvü Ruslan İzzətli isə çıxışında bildirib:

“Yeganə günahımız 30 illik avtoritar sistemə etirazımız, şəffaf və hesabatlı dövlət istəməyimiz, insan ləyaqətini müdafiə etməyimizdir”.

Əli Zeynal: “Siyasi etikaya biz əməl etdik, amma…”

İDİ əməkdaşı Əli Zeynal çıxışında qeyd edib ki, xaricdəki etikadan uzaq, aqressiv yanaşmalardan fərqli olaraq, Ələsgər Məmmədli və ətrafındakılar hər zaman etik davranışın tərəfdarı olublar. O deyib:

“Ələsgər bəyin göstərişi ilə biz etik çərçivədən çıxmırdıq. Amma indi bizi məhz buna görə ittiham edirlər”.

“Ortada sübut yoxdur” – Müşfiq Cabbar

Toplum TV-nin video redaktoru Müşfiq Cabbar isə bildirib ki, istintaq artıq başa çatıb, amma ortaya heç bir sübut çıxarılmayıb.

İttiham: 79 min manat borc

Prosesdə zərərçəkən qismində çıxış edən Vergilər Nazirliyi Toplum TV və İDİ təmsilçilərinin dövlətə 79 min manat borcu olduğunu iddia edib. Vəkillər Rəsul Cəfərov, Fəxrəddin Mehdiyev və təqsirləndirilənlər bu məbləğə etiraz ediblər.

Ramil Babayev qeyd edib ki, müxtəlif vaxtlarda işləyən şəxslərdən eyni məbləğdə pulun tələb edilməsi işin sifarişli olduğunu göstərir.

Növbəti proses: 7 iyul

Məhkəmənin növbəti iclası iyulun 7-də saat 10:00-a təyin olunub.


Arxa fon: Toplum işi üzrə 10 nəfər təqsirləndirilir

“Toplum işi” üzrə ümumilikdə 10 nəfərə cinayət işi açılıb. Onlar arasında:
• Ələsgər Məmmədli, Ruslan İzzətli, Akif Qurbanov
• Fərid İsmayılov, Müşfiq Cabbar, Əli Zeynal, Ramil Babayev, İlkin Əmrahov
• Elmir Abbasov (polis nəzarətində)
• Şahnaz Bəylərqızı (ev dustaqlığından sonra polis nəzarətində)

Başlanğıcda qaçaqmalçılıq, sonradan isə qeyri-qanuni maliyyə fəaliyyəti kimi ağırlaşdırılan ittihamları təqsirləndirilənlər rədd edir, işin siyasi sifariş olduğunu bildirirlər.