“Meydan TV işi” üzrə həbs edilən jurnalist Şəmşad Ağa (Ağayev) 25 iyun 2025-ci il tarixində Xətai Rayon Məhkəməsində keçirilən prosesdə kəskin və siyasi məzmunlu çıxışla yadda qalıb.

Hakim Rafael Sadıxovun sədrliyi ilə keçirilən iclasda jurnalist məhkəmənin siyasi sifarişlə hərəkət etdiyini bildirib və onu “komediya” adlandırıb:

“Mən bu məhkəməyə gəlmək istəmirdim, çünki siyasi işlərdə hakimlər heç bir funksiya daşımırlar, sadəcə verilən siyasi qərarları elan edən tamadalardır. Ona görə də sizin üzünüzü görmək istəmirəm. Nə qərar verirsinizsə, bizsiz verin, bitirin bu komediyanı”, – deyə o bildirib.

“Xaricdə olmamışam, amma ittihamda var”

Jurnalist əlavə edib ki, barəsində səsləndirilən ittihamlar sübuta yetirilməyib və xüsusilə xarici valyuta və səfərlərlə bağlı iddiaların heç bir əsası yoxdur:

“2024-cü ildə ümumiyyətlə xaricdə olmamışam. Halbuki ittihamda yazılıb ki, dəfələrlə xaricə getmişəm və valyuta bəyan etmişəm. Bəs necə getmişəm, əgər eyni istintaq orqanı “Toplum TV işi” üzrə mənim ölkədən çıxışıma “stop” qoyub? Dövlət Sərhəd Xidmətinə sorğu göndərmək bu qədərmi çətindir?”

O, Meydan TV-dəki yazılarına görə qaçaqmalçılıqda ittiham olunmasını absurd adlandırıb:

“İndi jurnalistin yazısı maddi sübut sayılır? Sabah “Vaşinqton Post”da yazım çıxsa, gəlib sizinlə məsləhətləşməliyəm? Bu absurddur! Jurnalistika yaradıcı sahədir, bürokratik sistem deyil!”

Hakimlə gərgin dialoq: “O kimdir?”

Çıxış zamanı hakim Rafael Sadıxovun jurnalistin fikirlərini yarımçıq kəsməsi zalda gərginliyə səbəb olub:
• Hakim: Hansı inkişaf etmiş ölkələr? Yaxın Şərq qan gölünə dönüb.
• Şəmşad Ağa: Siz siyasi tərəf kimi çıxış edirsiniz?
• Hakim: Xeyr.
• Şəmşad Ağa: Yaxın Şərq ona görə qan gölünə çevrilib ki, orada da sizin kimi despot rejimlərdir. İkincisi, Yaxın Şərqi qan gölünə çevirənlər sizin lobbiçiliyinizlə məşğul olanlardır.
• Hakim: 15 ildir jurnalist işləyirsiniz. Bəs niyə indi tutublar?
• Şəmşad Ağa: Corc Orueli oxumusunuz?
• Hakim: O kimdir?
• Şəmşad Ağa: Heç nə. Sizinlə müzakirə bitib.

“Media haqqında qanun edam hökmüdür”

Şəmşad Ağa çıxışında həmçinin 2024-cü ildə qəbul edilən “Media haqqında” Qanunu tənqid edib və onun Konstitusiya və insan haqları konvensiyalarına zidd olduğunu bildirib:

“Həmin qanun müstəqil medianın edam hökmüdür. Mən bu qanunun Konstitusiyaya zidd olması barədə 30 səhifəlik əsaslandırılmış müraciəti Konstitusiya Məhkəməsinə təqdim etmişəm. Amma indiyədək baxılmayıb.”

O qeyd edib ki, Meydan TV Azərbaycan informasiya mühasirəsini yarmaq üçün fəaliyyət göstərən müstəqil platformadır, ona görə də təzyiqlərə məruz qalır:

“Bu qərar Prezident Administrasiyasından və şəxsən İlham Əliyev tərəfindən verilib. Amma heç bir cəza və siyasi qərar həqiqətin mahiyyətini dəyişməyəcək. Yaşasın söz və ifadə azadlığı!”