İşgəncələr Əleyhinə Araşdırma Mərkəzinin sədri Fikrət Cəfərli xüsusi ittiham qaydasında qaldırılan iddia üzrə təqsirləndirilən şəxs qismində tanınıb. İyulun 7-də Binəqədi Rayon Məhkəməsində keçirilən hazırlıq iclasında hakim Zamiq Bağırov bu barədə qərar verib.

İddia Vəkillər Kollegiyası İntizam Komissiyasının üzvü, vəkil Elvin Əliyev tərəfindən qaldırılıb. Vəkil şikayətində Cəfərlinin ona böhtan atdığını və işgüzar nüfuzuna xələl gətirdiyini iddia edir. Əsas arqument isə hazırda həbsdə olan Elvin Allahverdiyevin şikayətinin İşgəncələr Əleyhinə Araşdırma Mərkəzinin “Facebook” səhifəsində yayılmasıdır.

Allahverdiyev bildirib ki, vəkil ondan 10 min 500 manat alıb və məhkəmədə 1 il 6 ay cəza alacağına söz verib. Lakin bu baş vermədiyindən pulu geri istəyəndə, vəkil onu hədələyib. Mərkəz bu iddiaları Facebook səhifəsində jurnalistik istinadla yayıb.

Fikrət Cəfərli məhkəmədə bildirib ki, bu paylaşımlar onun şəxsi fikri deyil və təşkilat yalnız ictimai məlumatı dərc edib. O, məhkəmənin işi icraata götürməsinə və təqsirləndirilən şəxs kimi tanınmasına etiraz edib. Xüsusilə, dövlət hesabına təyin olunan vəkilin onunla eyni mövqeni bölüşməməsinə sərt reaksiya verib:

“Mən deyirəm, icraata götürülməsin, siz mənim mövqeyimə zidd gedirsiniz. Belə vəkillik olur?!”

Elvin Əliyev isə israrla iddianın araşdırılmasını və Fikrət Cəfərlinin məsuliyyətə cəlb olunmasını istəyib.

Məhkəmə qısa müşavirədən sonra iddianın icraata götürülməsinə qərar verib. Bununla da Fikrət Cəfərli rəsmi olaraq təqsirləndirilən şəxs, Elvin Əliyev isə xüsusi ittihamçı statusu alıb. Məhkəmə baxışı iyulun 14-nə təyin edilib.

Cəfərli bu prosesi siyasi sifariş sayır və hesab edir ki, bu, Vəkillər Kollegiyasını tənqid etdiyi üçün ona qarşı həyata keçirilən təzyiq kampaniyasının tərkib hissəsidir.

Xatırladaq ki, Cinayət Məcəlləsinin 147.1-ci maddəsi böhtanla bağlı məsuliyyət nəzərdə tutur və bu, cərimədən 6 ayadək azadlıqdan məhrumetməyədək cəza tətbiqini mümkün edir.