Həbsdə olan ictimai fəal Bəxtiyar Hacıyevin ailəsi onun saxlanma şəraiti və səhhəti ilə bağlı narahatlığını bildirib.

Məlumata görə, 6 saylı cəzaçəkmə müəssisəsində saxlanılan Hacıyev kobud rəftara məruz qalır, ailəsi və vəkili ilə görüşməsinə icazə verilmir.

“Onunla əsir kimi davranılır və özü də bu vəziyyəti əsirlik kimi qiymətləndirir. Psixoloji və fiziki təzyiqlər altındadır. Görüntülü danışmaq hüququndan məhrum edilib, ailəsindən tam təcrid olunub,” – deyə ailəsi açıqlama verib.

Bildirilib ki, fəalın səhhəti pisləşib, tibbi yardıma ehtiyacı var. Yalnız bir dəfə kardioqramma edilib, qan analizi götürülüb, lakin nəticələr hələ təqdim olunmayıb. Hacıyev yerinin dəyişdirilməsini tələb edir və əks halda intihara cəhd edə biləcəyini bildirib.

Ailə iddia edir ki, Penitensiar Xidmətin rəisi Mirsaleh Seyidovun məsələyə “qərəzli” yanaşması vəziyyəti ağırlaşdırır.

Bəxtiyar Hacıyev 2022-ci ilin dekabrında xuliqanlıq və məhkəməyə qarşı hörmətsizlik ittihamları ilə həbs olunub.

Ötən il ona Cinayət Məcəlləsinin 192-ci (qanunsuz sahibkarlıq), 193-1-ci (cinayət yoluyla əldə edilmiş əmlakı leqallaşdırma), 206-cı (qaçaqmalçılıq), 320-ci (saxta sənədlərdən istifadə) 213.1-ci (vergidən yayınma) maddələri ilə ittiham irəli sürülüb.

Bu ilin yanvarında Hacıyev 10 il müddətinə azadlıqdan məhrum edilib.

Bəxtiyar Hacıyev irəli sürülən ittihamları qəbul etmir, həbsinin siyasi fəaliyyəti ilə bağlı olduğunu bildirir.

Yerli və beynəlxalq hüquq müdafiə təşkilatları Bəxtiyar Hacıyevin həbsini siyasi motivli hesab edir.