Baş Prokurorluqda istintaqı aparılan yerli və beynəlxalq qeyri-hökumət təşkilatları (QHT) ilə bağlı cinayət işi çərçivəsində təqsirləndirilən bir sıra vətəndaş cəmiyyəti fəallarına qarşı ittihamların ağırlaşdırıldığı bildirilir.

“Azadlıq Radiosu”nun məlumatına görə, bəzi şəxslərə yeni maddələr üzrə ittiham elan olunub, digərlərinin isə mövcud ittihamları daha ağır cinayət maddələri ilə əvəzlənib. Bu dəyişikliklərin həm həbsdə saxlanılanlara, həm də barəsində alternativ qətimkan tədbiri seçilmiş şəxslərə şamil ediləcəyi gözlənilir.

Bəşir Süleymanlıya əlavə ittihamlar

Vətəndaş Hüquqları İnstitutunun rəhbəri Bəşir Süleymanlının vəkili Fariz Namazlı təsdiqləyib ki, müvəkkilinə əlavə ittihamlar irəli sürülüb.

İlkin olaraq Süleymanlıya:
• CM-in 193-1.3.2 (cinayət yolu ilə əldə edilmiş xeyli miqdarda əmlakı leqallaşdırma),
• 308.2 (vəzifə səlahiyyətlərindən sui-istifadə – ağır nəticələr olduqda),
• 313 (vəzifə saxtakarlığı)

maddələri ilə ittiham verilmişdi.

Sonradan ittihamlar genişləndirilib – ona qarşı CM-in 193-1.2.2 və 193-1.2.3 (cinayət yolu ilə əldə edilmiş əmlakı təkrar və qulluq mövqeyindən istifadə etməklə leqallaşdırma) maddələri də əlavə edilib. Bununla yanaşı, 308.2-ci maddə nisbətən yüngülləşdirilərək 308.1-lə əvəz olunub. Bu maddələrin sanksiyasında 12 ilədək həbs cəzası nəzərdə tutulur.

Vəkil Namazlı bildirib ki, Süleymanlı ittihamların heç birini qəbul etmir və fəaliyyətinə görə həbs olunduğunu düşünür.

Digər saxlanılanlar

“QHT işi” üzrə bu ilin mart ayında saxlanılanlar arasında:
• “Seçki Müşahidə” Alyansının icraçı direktoru Məmməd Alpay (Məmmədzadə),
• Vətəndaş Hüquqları İnstitutunun rəhbəri Bəşir Süleymanlı,
• “Hüquq və İnkişaf” İB rəhbəri Hafiz Həsənov,
• “Media Hüququ” İnstitutunun koordinatoru Xalid Ağəliyev olub.

Sonradan Xalid Ağəliyev sərbəst buraxılıb, Hafiz Həsənov barəsində isə ev dustaqlığı qətimkan tədbiri seçilib.

Apreldə Gəncə Regional İcma Mərkəzinin rəhbəri Asəf Əhmədov və sosial işçi Zamin Zəki də həbs olunublar. Sosial Hüquqlar Mərkəzinin rəhbəri Sübhan Həsənli və ictimai fəal Aytac Ağazadə isə ölkədə olmadıqlarına görə qiyabi həbs olunaraq axtarışa verilib.

İş üzrə bir sıra digər QHT rəhbərləri və üzvləri polis nəzarətinə buraxılıb. Onların arasında Mehriban Rəhimli (ABŞ-ın Alman Marşall Fondunun Azərbaycan üzrə məsləhətçisi), Qalib Bayramov (İqtisadi Tədqiqatlar Mərkəzinin sədri) və digərləri var.

Araşdırmalar davam edir.