Sentyabrın 3-də Bakı Apellyasiya Məhkəməsində “İşçi Masası” Həmkarlar İttifaqları Konfederasiyasının üzvü Elvin Mustafayevin işi üzrə proses keçirilib. Hakim Elmar Rəhimovun sədrlik etdiyi iclasda fəalın 6 ay müddətinə ciddi rejimli həbsxanaya köçürülməsi ilə bağlı qərardan verilən apellyasiya şikayəti təmin olunmayıb.

Bu barədə “Meydan TV”yə fəalın atası Əli Mustafayev məlumat verib. Onun sözlərinə görə, ailə və vəkil Zibeydə Sadıqova qərarın əsassız olduğunu məhkəmədə vurğulasa da, şikayət qəbul edilməyib:

“Dedik ki, günahsız olduğu halda Elvinə 6 ay iş verilib. Vəkil də danışdı, amma məhkəmə onların heç birini nəzərə almadı”, – deyə Əli Mustafayev bildirib.

Elvin Mustafayev mayın 6-da saxlanıldığı 13 saylı Cəzaçəkmə Müəssisəsində siyasətçi Tofiq Yaqublunun azadlığa buraxılması tələbilə aclıq aksiyasına başlayıb. Ardınca 14 günlük cərimə kamerasına salınıb və daha sonra 6 saylı Cəzaçəkmə Müəssisəsinə köçürülüb. Onun cərimə kamerasında saxlanma müddəti dəfələrlə uzadılıb.

İyulun 10-da Nizami Rayon Məhkəməsi müəssisə rəhbərliyinin təqdimatını təmin edərək fəalın ciddi rejimli həbsxanaya köçürülməsinə qərar verib. Təqdimatda Mustafayevin daxili intizam qaydalarını pozduğu, müxalifətçiliklə məşğul olduğu və əsassız şikayətlər etdiyi iddia olunub. Fəal isə bütün ittihamları rədd edərək, bunları təzyiq və bəhanə adlandırıb, hətta müəssisə rəhbərliyi tərəfindən döyüldüyünü bildirib.

Elvin Mustafayev 2023-cü il yanvarın 31-də 3 il müddətinə azadlıqdan məhrum edilib. Ona qarşı əvvəlcə satış məqsədilə külli miqdarda narkotik daşıma ittihamı irəli sürülsə də, sonradan bu ittiham külli miqdarda narkotik saxlama ilə əvəzlənib.

Fəal ittihamları qəbul etmir və həbsini siyasi fəaliyyəti ilə əlaqələndirir. Hüquq müdafiəçiləri də onu siyasi məhbus kimi tanıyırlar. Onların açıqlamalarına görə, hazırda Azərbaycanda 370-dən çox siyasi məhbus var. Rəsmi qurumlar isə bu iddiaları təkzib edir.