USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Azərbaycanlı jurnalist Cavid Əhmədovun Gürcüstana girişinə qadağa qoyuldu
Gürcüstan İctimai Əlaqələr İnstitutunda (GIPA) magistratura təhsili alan azərbaycanlı jurnalist Cavid Əhmədov ölkəyə buraxılmadığını açıqlayıb. O, məsələ barədə “Abzas Media”ya danışıb.
Əhmədovun sözlərinə görə, sentyabrın 6-da Tbilisi Hava Limanında sərhədçilər ona Gürcüstan parlamenti qarşısında yolu bağlamaqda ittiham irəli sürərək ümumilikdə 10 min lari (təxminən 3 700 ABŞ dolları) məbləğində cərimə tətbiq olunduğunu bildiriblər. Sərhədçilər jurnalistin bu məbləği ödəsə belə, ölkəyə buraxılmayacağını vurğulayıblar.
“İzah istəyəndə heç bir əsas göstərmədilər, yalnız ‘digər səbəblər’ ifadəsini təkrar edirdilər,” – deyə jurnalist bildirib. Əhmədov deyir ki, prosedur ərzində ondan jurnalist fəaliyyəti ilə bağlı suallar soruşulub, o isə Rustaveli prospektindəki etiraz aksiyalarında yalnız reportyor kimi iştirak etdiyini izah edib.
Onun sözlərinə görə, sərhədçilər pasportundakı ABŞ vizasına da xüsusi diqqət yetirərək bunu sanki “cinayət” kimi qiymətləndiriblər. Daha sonra o, Türkiyəyə geri göndərilib. Jurnalist şəxsi əşyalarının, o cümlədən təhsil və iş üçün istifadə etdiyi kompüterinin Gürcüstanda qaldığını deyir.
Əhmədov əlavə edib ki, avqustun 24-də Gürcüstandan Türkiyəyə keçərkən Sarp sərhəd məntəqəsində də ona 5 min lari (təxminən 1 850 ABŞ dolları) məbləğində cərimə tətbiq edildiyi bildirilib. Sərhədçilər pasportunu “məcburi möhürləyərək” yalnız geri dönəndə cəriməni ödəyə biləcəyini söyləyiblər.
Jurnalistin sözlərinə görə, hazırda təhsil aldığı GIPA və ABŞ səfirliyi vəziyyət barədə məlumatlıdır və ona dəstək göstərməyə çalışır.
