Həbsdə olan jurnalist Polad Aslanovun aclıq aksiyası fonunda səhhəti kəskin pisləşib. Onun həyat yoldaşı Gülmirə Aslanova bu barədə Facebook səhifəsində məlumat paylaşıb.

Aslanovanın yazdığına görə, sentyabrın 8-nə keçən gecə, saat 02:00 radələrində 15 saylı Cəzaçəkmə Müəssisəsində saxlanılan jurnalist “şok vəziyyəti” keçirib:

“Dedi ki, onu titrəmə tutub, ayaqlarını hiss etməyib və ayıla bilməyib. Yataqda bir neçə dəqiqə köməksiz vəziyyətdə qalıb”.

Həyat yoldaşının sözlərinə görə, Polad Aslanov aclıq aksiyasını davam etdirir. Onun müəssisə rəisi Ramiq Nəsibova ünvanladığı ərizə hələ də qəbul edilməyib.

Polad Aslanov avqustun 29-dan etibarən aclıq edir. Aksiya onun saxlanıldığı müəssisənin tibb məntəqəsinin mətbəxindən istifadəsinə icazə verilməməsi ilə bağlıdır. Jurnalist, həmçinin, iyulun 18-də keçirilmiş ultrasəs müayinəsinin nəticələrinin təqdim edilməsini tələb edir. Aslanovanın sözlərinə görə, tibb məntəqəsinin baş həkimi Cavanşir onun etirazına cavab olaraq mətbəxdən istifadəsinə qadağa qoyub.

Polad Aslanov 2019-cu ildə casusluq ittihamı ilə həbs edilib, ittihamları rədd edir və həbsi jurnalist araşdırmalarına görə siyasi motivli hesab edir. Hüquq müdafiəçiləri onu siyasi məhbus kimi tanıyır. Avropa İnsan Hüquqları Məhkəməsi də onun həbsi ilə bağlı Azərbaycana qarşı qərar çıxarıb.