SOCAR-ın investisiya üzrə sabiq sədr müavini Adnan Əhmədzadənin həbsi ilə bağlı xəbərlər yayıldıqdan sonra onun həyat yoldaşı Gülsəfa Cəfərova sosial şəbəkə hesablarında dəyişikliklər edib.

Məlumata görə, Əhmədzadədən 14 yaş kiçik olan Cəfərova özünün dəbdəbəli həyat tərzini əks etdirən fotolarını və paylaşımlarını silib.

Əhmədzadəyə qarşı ittihamlar

Qeyd edək ki, Adnan Əhmədzadə “Azeri Light” markalı nefti digər xam neft məhsulları ilə qarışdırmaqda və iqtisadi təhlükəsizliyə qarşı təxribatda ittiham olunur. Dövlət Təhlükəsizliyi Xidmətində aparılan cinayət işi çərçivəsində o, xüsusilə külli miqdarda mənimsəmədə də təqsirləndirilir.

4 aylıq həbs qətimkan tədbiri seçildi

Bu gün Bakı şəhəri Səbail Rayon Məhkəməsində keçirilən baxış zamanı Adnan Əhmədzadə barəsində 4 aylıq həbs qətimkan tədbiri seçilib.

Əhmədzadənin həbsi ölkə ictimaiyyətində geniş müzakirələrə səbəb olub. Bəzi ekspertlər bunu onun illər ərzində əldə etdiyi sərvətlərin əlindən alınması istiqamətində atılan addım kimi qiymətləndirirlər.