Avropa İnsan Hüquqları Məhkəməsi (AİHM) “İşçi Masası” Həmkarlar İttifaqları Konfederasiyasının həbsdə olan üzvü Möhyəddin Orucov barədə qərar verib.

İşçi Masasının yaydığı məlumata görə, şikayət Orucovun 2023-cü il oktyabrın 18-də 30 sutka inzibati həbs və 200 manat cərimə alması ilə bağlı olub. Fəal Avropa Konvensiyasının 6-cı maddəsi – “ədalətli məhkəmə araşdırması hüququ”nun pozulduğunu iddia edib.

Azərbaycan hökuməti ilkin mərhələdə dostcasına həll variantlarını müzakirə etsə də, sonradan AİHM-ə birtərəfli bəyanatlar təqdim edib və pozuntuları qəbul edərək, zərərçəkənlərə kompensasiya ödəməyə hazır olduğunu bildirib.

Qərara əsasən, M.Orucova mənəvi zərərə görə 900 avro, əlavə xərclər üçün isə 225 avro ödəniləcək.

Qeyd olunur ki, Orucov hadisə zamanı polis tərəfindən işgəncəyə məruz qalması barədə mediaya danışdıqdan sonra, 2023-cü il dekabrın 13-də yenidən həbs olunub və bu ilin fevralında Bakı Ağır Cinayətlər Məhkəməsinin hökmü ilə 3 il azadlıqdan məhrum edilib.

İşçi Masasının digər üzvü Ayxan İsrafilov isə 10 saylı cəzaçəkmə müəssisəsində müəssisədaxili məhkəmə prosesinə məruz qalıb. Bu məhkəmələr adətən nümunəvi davranış göstərən və cəzasının sonuna yaxınlaşan məhbusların azadlığa buraxılması ilə nəticələnir. Lakin İsrafilovun işində fərqli qərar verilib: 2023-cü ildə Şüvəlan təcridxanasından ailəsinə məktub göndərməsi irad kimi qiymətləndirilib və 2024-cü ildə 10 gün karserdə saxlanması əsas gətirilərək azadlığa buraxılması rədd edilib. İsrafilov bu qərarla razılaşmayaraq karserə salınma sənədlərinin saxta olduğunu bildirib.

Xatırladaq ki, “İşçi Masası” Həmkarlar İttifaqları Konfederasiyasının 2022-ci ildə yaradılan dörd üzvü – sədr Afiəddin Məmmədov, üzvlər Ayxan İsrafilov, Elvin Mustafayev və Möhyəddin Orucov – hazırda həbsdədir. Onlar müxtəlif ittihamlarla üzləşsələr də, ittihamların hamısını qurama və siyasi xarakterli sayırlar.