Bu gün Avropa İnsan Haqları Məhkəməsi (AİHM) Azərbaycandan göndərilmiş bir sıra işlər üzrə qərarlarını elan edib. Qərarlar Vüqar Əliyev, Fuad Qəhrəmanlı, Pərviz Həşimli, Əfqan Muxtarlı, Natiq Ədilov, Eldar Hüseynov, Nizami Cəfərov, Ağaverdi Ruşanov və Kamilə Aslanova ilə bağlı olub.

Məlumatı vəkil Fariz Namazlı öz Facebook səhifəsində paylaşıb.

Vüqar Əliyev işi:
Məhkəmə onun barəsində həbs qərarının əsaslandırılmamasını (5.3 maddə) və məhkəmə prosesində metal qəfəsdə saxlanmasını (3 maddə) pozuntu sayıb.
Azərbaycan hökuməti Vüqar Əliyevə 3900 avro mənəvi zərər, 500 avro xərclər üçün ödəyəcək.

Fuad Qəhrəmanlı işi:
AİHM onun əsassız yerə həbsdə saxlanıldığını (5.1 maddə) və həbsin uzadılmasının da yetərli əsaslara söykənmədiyini (5.3 maddə) müəyyən edib.
Qəhrəmanlıya 5200 avro mənəvi zərər, 500 avro əlavə xərclər təyin olunub.

Pərviz Həşimli işi:
Məhkəmə onun həbsinin qanunsuz olduğunu (5.3 maddə), məhkəmədə müdafiə hüququnun pozulduğunu (6.1 və 6.3(c) maddələr), həmçinin evində və ofisində aparılan axtarışların qanunsuz olduğunu (8 maddə) tanıyıb.
Həşimliyə 5900 avro mənəvi zərər, 500 avro əlavə xərclər təyin edilib.

Araz Cabbarov işi:
Onun 2 gün ərzində rəsmi qərar olmadan polis idarəsində saxlanılması qanunsuz sayılıb.
Məhkəmə 2000 avro mənəvi zərər, 500 avro əlavə xərclər müəyyən edib.

Əfqan Muxtarlı, Natiq Ədilov, Eldar Hüseynov, Nizami Cəfərov, Ağaverdi Ruşanov və Kamilə Aslanova işləri:
Bu şəxslərin polis idarəsində qərarsız saxlanılması ilə bağlı şikayətləri üzrə 5.1 maddənin pozuntusu tanınıb.

Hər birinə 2000 avro mənəvi zərər, 500 avro əlavə xərclər ödəniləcək.

Fariz Namazlı bildirib ki, hökumət onun imzasının saxtalaşdırıldığını iddia etsə də, AİHM bu arqumenti əsassız hesab edib.