Avropa İnsan Hüquqları Məhkəməsi (AİHM) jurnalist Xədicə İsmayılın Cinayət Məcəlləsinin 147-ci maddəsi (böhtan) üzrə məhkum edilməsinə dair şikayətini əsaslı hesab edib.

Bu barədə vəkil Fariz Namazlı oktyabrın 14-də məlumat yayıb.

Vəkilin sözlərinə görə, iş 2014-cü ildə Elman Həsənovun (Bayraqdar) xüsusi ittiham qaydasında şikayəti əsasında başlanmışdı. O, jurnalistin “Facebook” hesabında yayımladığı bir paylaşımda şəxsi həyatına müdaxilə və böhtan atıldığını iddia etmişdi.

Binəqədi Rayon Məhkəməsi həmin vaxt Xədicə İsmayılı 2500 manat məbləğində cərimələyib və sübut kimi Milli Təhlükəsizlik Nazirliyinin Antiterror Mərkəzindən təqdim olunan məktubu əsas götürmüşdü.

Jurnalist ittihamı rədd edərək, bu prosesin siyasi motivli olduğunu bildirmişdi.

AİHM qərarında qeyd olunub ki, məhz həmin məktub Xədicə İsmayılın məhkumluğu üçün həlledici rol oynayıb, lakin jurnalistin və vəkillərinin — mərhum Elton Quliyev və Yalçın İmanovun şahidin (MTN əməkdaşının) dindirilməsi ilə bağlı dəfələrlə qaldırdıqları vəsatətlər təmin edilməyib.

Məhkəmə müəyyən edib ki, şahidin dindirilməməsi üçün əsaslı səbəb olmayıb və bu hal müdafiə hüququnun ciddi pozulması deməkdir.

Nəticədə AİHM Avropa Konvensiyasının 6.1 və 6.3(d) maddələrinin — yəni ədalətli məhkəmə araşdırması və şahidləri dindirmək hüququnun pozulduğunu tanıyıb.

Qərara əsasən, Azərbaycan hökuməti jurnalistə 3 600 avro mənəvi zərər, 1 500 avro isə məhkəmə xərcləri ödəməlidir.