“Meclis.info” saytının rəhbəri İmran Əliyev, ictimai fəal Elgiz Qəhrəman və Tamella Musayeva barəsində olan cinayət işi üzrə Bakı Ağır Cinayətlər Məhkəməsində məhkəmə prosesi davam etdirilir.

APA-nın məlumatına görə, iyunun 10-da hakim Roman Ələkbərlinin sədrliyi ilə keçirilən iclasda dövlət ittihamçısı Cövdət Mehralıyev ittiham aktını elan edib.

İttiham aktında qeyd olunub ki, təqsirləndirilən şəxslər – İmran Əliyev və digərləri “Meclis.info” saytının fəaliyyəti üçün xarici donor təşkilatlardan qrantlar alıblar və həmin vəsaitləri gömrük orqanlarında bəyan etmədən ölkəyə gətiriblər. Bildirilir ki, bu hərəkətlər “Abzas Media işi” üzrə həbs olunan jurnalistlərlə birgə həyata keçirilib.

Cinayət işi üzrə Gəncə Regional Vergi Dairəsi zərərçəkmiş kimi tanınıb.

Təqsirləndirilən şəxslər məhkəmədə özlərini təqsirli bilmədiklərini bildiriblər. Növbəti məhkəmə iclası 17 iyun tarixinə təyin edilib.

Qaçaqmalçılıqda ittiham olunan “Meclis.info” saytının rəhbəri İmran Əliyev 2024-cü ilin aprelində saxlanılıb. O, saxlanılarkən polis əməkdaşları tərəfindən zorakılığa məruz qaldığını, döyüldüyünü və bədəninə elektrik cərəyanı verildiyini iddia edib. Əliyev həmçinin bu işgəncələrin nəticəsində ona sənədlərin zorla imzalatdırıldığını bildirib.

İş üzrə digər təqsirləndirilən şəxs – ictimai fəal Elgiz Qəhrəman polis nəzarətinə verilib. Ona qarşı Cinayət Məcəlləsinin 8 maddəsi ilə ittiham irəli sürülüb. Həmin maddələr üzrə 12 ilədək azadlıqdan məhrumetmə cəzası nəzərdə tutulur.

Qeyd edək ki, “Meclis.info” platforması Azərbaycan parlamentinin fəaliyyəti ilə bağlı ictimai monitorinq aparırdı.