Azərbaycanda dövlət idarəçiliyində və parlamentdə yaşlı məmurların çoxluğu uzun illərdir ictimai müzakirə mövzusudur. Cəmiyyətin bir hissəsi hesab edir ki, yaşı 80-ə çatan şəxslərin hələ də yüksək vəzifələrdə qalması idarəetmədə dinamizmin və yenilənmənin qarşısını alır.

Hazırda həm icraedici hakimiyyətdə, həm də Milli Məclisdə 80 yaşını adlamış bir neçə tanınmış sima fəaliyyətini davam etdirir.

Yaqub Eyyubov – Baş nazirin birinci müavini 1945-ci il təvəllüdlüdür. Oktyabrın 24-də onun 80 yaşı tamam olur. Prezident İlham Əliyev yubiley münasibətilə Y.Eyyubovu “İstiqlal” ordeni ilə təltif edib.

Əhməd Əhmədzadə – Baş nazirin köməkçisi, keçmiş “Meliorasiya və Su Təsərrüfatı” ASC sədri də 1945-ci ildə doğulub. Bu ilin 7 yanvarında onun 80 yaşı tamam olub.

Ziyad Səmədzadə – Milli Məclisin ən yaşlı deputatıdır. 25 iyun 1940-cı il təvəllüdlü iqtisadçı alim parlamentin III, IV, V, VI və VII çağırışlarının üzvü olub. Hazırda 85 yaşı var.

Polad Bülbüloğlu – Azərbaycanın Rusiyadakı sabiq səfiri, hazırda Milli Məclisin VII çağırış deputatıdır. 9 fevral 1945-ci ildə doğulan P.Bülbüloğlu həmçinin I çağırış parlamentin də üzvü olub.

Eldar İbrahimov – Milli Məclisin bütün çağırışlarında deputat seçilmiş yeganə siyasətçidir. 12 mart 1945-ci il təvəllüdlü deputat bu ilin yazında 80 yaşını qeyd edib.

Ekspertlər hesab edirlər ki, dövlət idarəçiliyində belə yüksək yaşlı şəxslərin qalması cəmiyyətin və gənc nəsilin idarəetmədə təmsil olunmasına mane olur. Onların fikrincə, idarəçilik təcrübəsi mühüm olsa da, yeni ideyalar və çağdaş idarəetmə yanaşmaları üçün siyasi sistemin gəncləşməsi vacibdir.

Mövzu sosial şəbəkələrdə də geniş rezonans doğurub. İstifadəçilərin bir qismi bu şəxsləri “dövlətə sədaqətli” fiqurlar kimi qiymətləndirir, digərləri isə 80 yaşlı məmurların yenilənməyə imkan vermədiyini vurğulayır.

???? Cəmiyyətdə ümumi fikir belədir: “80 yaşlı məmur millətə və dövlətə fayda verə bilməz, sistem gəncləşməlidir.”