Bugün keçirilən məhkəmə prosesində general-mayor Raul Zeynalovun da adı keçən “şabalıd işi” ilə bağlı iclas media üçün qapadılıb. Hakim, zərərçəkmiş şəxslərin xahişi ilə jurnalistin zalda iştirakına icazə verməyib.

İclas zamanı əsas zərərçəkmişlərdən Yasin Muradov (Fövqəladə Hallar Nazirliyinin şöbə müdiri, polkovnik-leytenant) və Kəmalə Əliyeva təqsirləndirilənin külli miqdarda pulunu ələ keçirdiyini bildirərək prosesi şəxsi məsələ kimi qiymətləndiriblər. Təqsirləndirilən kapitan Ayaz Bayramov isə prosesin media iştirakı ilə keçməsini xahiş etsə də, bu təmin olunmayıb.

Məlumata görə, iclas gərgin keçib: Yasin Muradov 200 min manatdan çox pul iddiası ilə bağlı Ayaz Bayramovla mübahisə edib, Bayramov isə zərərçəkmişlərin Raul Zeynalovun sifarişi ilə danışdıqlarını deyib.

Növbəti iclasda general Raul Zeynalov məhkəməyə çağırılacaq.

Qeyd edək ki, kapitan Ayaz Bayramov Fövqəladə Hallar Nazirliyində çalışıb və general Zeynalov, idarənin digər iki zabiti və 6 nəfərlə birlikdə təxminən 3 milyon manat vəsaiti dələduzluq yolu ilə ələ keçirməkdə ittiham olunur. Ayaz Bayramov bir neçə gün əvvəl istintaq təcridxanasından göndərdiyi məktubda həbsinə görə Zeynalovu günahlandırıb.