“Kanal 13” internet televiziyasının rəhbəri Əziz Orucov azadlığa çıxıb. Onun cəza müddəti bu gün başa çatıb və o, Penitensiar Xidmətin 16 saylı cəzaçəkmə müəssisəsindən azad edilib.

Əziz Orucov 2023-cü il noyabrın 27-də “icazəsiz ev tikintisi” ittihamı ilə həbs olunmuşdu. Daha sonra ona “valyuta qaçaqmalçılığı” maddəsi də əlavə edilsə də, istintaqın sonunda bu ittiham işdən çıxarılıb. 2024-cü il fevralın 26-da Səbail Rayon Məhkəməsinin hakimi Günel Səmədovanın sədrliyi ilə keçirilən prosesdə jurnalist 2 il azadlıqdan məhrumetmə cəzasına məhkum edilmişdi.

Orucov ittihamları qəbul etmir, həbsi isə jurnalist fəaliyyətinə görə siyasi sifariş adlandırır. Hüquq müdafiəçilərinin məlumatına görə, hazırda Azərbaycanda 392 nəfər siyasi məhbus kimi tanınır.