İranda etiraz aksiyaları fonunda ölkənin qərbində yerləşən Abdanan və Məlikşahi (Malekşahi) şəhərləri ilə bağlı ziddiyyətli məlumatlar yayılıb.

İran Milli Müqavimət Şurasının nümayəndələrinin yaydığı məlumata görə, iqtisadi və siyasi narazılıqlar səbəbilə keçirilən kütləvi etirazlar zamanı İlam əyalətində yerləşən Abdanan və Məlikşahi şəhərləri faktiki olaraq etirazçıların nəzarətinə keçib. Bildirilib ki, bu, İranın qərb bölgəsində baş verən etirazlar baxımından “əhəmiyyətli hadisə” kimi qiymətləndirilir.

Lakin İranın rəsmi mövqeyini əks etdirən “Tasnim” və “Mehr” xəbər agentlikləri bu iddiaları təkzib ediblər. “Tasnim” agentliyi yazıb ki, Məlikşahi rayonunda bir neçə saat davam edən gərginlikdən sonra təhlükəsizlik qüvvələrinin bölgəyə nəzarəti bərpa olunub və vəziyyət tamamilə normallaşıb. “Mehr” agentliyi də Qərb mediasında yayılan xəbərlərin həqiqətə uyğun olmadığını bildirib.

Xatırladaq ki, dekabrın sonlarından etibarən İranda milli valyutanın dəyərdən düşməsi və iqtisadi çətinliklər fonunda etiraz aksiyaları başlayıb. Etirazlar ölkənin 25 əyalətində 60-dan çox şəhərə yayılıb. Ən geniş aksiyalar Tehranda, ən gərgin toqquşmalar isə ölkənin qərb və cənub-qərb bölgələrində, o cümlədən Məlikşahi, Kirmanşah və Lordeqan şəhərlərində qeydə alınıb.

Hazırda İran hakimiyyəti ölkədə vəziyyətin nəzarət altında olduğunu bildirsə də, müxalif mənbələr etirazların davam etdiyini iddia edir.