Gürcüstanda Marneuli-Bolnisi yolunun Naxiduri (Arıxlı) kəndi ərazisində yüksək sürətlə hərəkət edən avtomobil iki yeniyetməni vuraraq öldürüb.

Həyatını itirənlər azərbaycanlı yeniyetmələr - 15 yaşlı Elçin Binnətov və Sinan Şərifovdur. Kənd sakinləri bildirirlər ki, hadisədən sonra polislə vətəndaşlar arasında insident yaşanıb.


Buna səbəb isə təcili tibbi yardım briqadasının vurulan gənclərin deyil, hadisəni törədən şəxsin təcili tibbi yardım maşını ilə aparmaq istəməsi olub.

Gürcüstanın Daxili İşlər Nazirliyi hadisə ilə bağlı məlumat yayıb.

Nazirliyin məlumatına əsasən, mərkəzi magistral yolda iki azyaşlının ölmü ilə nəticələnən yol-nəqliyyat hadisəsi baş verdikdən sonra yerli əhali hadisə yerinə toplaşıb və vəziyyət gərginləşib. Bildirilir ki, hadisə yerinə toplaşan vətəndaşlar, eləcə də ictimai asayişi qorumaq üçün hadisə yerinə gələn hüquq-mühafizə orqanlarının əməkdaşları arasında insident baş verib. Qeyd olunur ki, yerli sakinlər toqquşmada iştirak edən avtomobili və təcili yardım briqadasının avtomobilini aşırıblar. Həmçinin digər vətəndaşların avtomobillərini zədələyərək sındırıblar. Bildirilir ki, sakinlər magistral yolda nəqliyyat vasitələrinin hərəkətinə imkan verməyib, həmçinin hüquq-mühafizə orqanları əməkdaşlarının istintaq hərəkətləri aparmasına və təcili tibbi yardım briqadasına mane olublar.

Vəziyyəti sabitləşdirmək üçün Daxili İşlər Nazirliyinin müxtəlif bölmələrinin nümayəndələri, o cümlədən patrul, kriminal və xüsusi təyinatlı idarələrinin əməkdaşları dərhal hadisə yerinə cəlb ediliblər. Qarşıdurma nəticəsində Daxili İşlər Nazirliyinin bir neçə əməkdaşı, həmçinin 8 vətəndaş müxtəlif xəsarətlər alıb, onlara müvafiq tibbi yardım göstərilib