Mərkəzi Seçki Komissiyasının (MSK) sədri Məzahir Pənahovun gəlini həyat yoldaşı Məhəmməd Pənahov tərəfindən fiziki və psixoloji şiddətə məruz qaldığını iddia edib. Şikayətçi xanım bu barədə Haqqin.az-a müraciətində bildirib.

Onun sözlərinə görə, hadisələr ABŞ-ın Kaliforniya ştatında baş verib. Qadın deyir ki, həyat yoldaşı spirtli içki aludəçisidir və dəfələrlə onu fiziki zorakılığa məruz qoyub. O, xüsusilə əri tərəfindən içki şüşələrinin üzərinə atıldığını və həmin dövrdə hamilə olduğunu qeyd edib. Xanım bu insidentlərdən birində uşaq itirdiyini də bildirib.

Cütlük 2022-ci ilin 28 iyununda Bakıda ailə qurduqdan sonra Los-Ancelesə köçüb. Lakin qadın 17 aylıq birgə həyatın ardından yaşadıqları villadan qaçaraq Bakıya dönmək məcburiyyətində qalıb. Onun sözlərinə görə, ailəsi və yaxınları dəfələrlə ona Kaliforniyada hüquq-mühafizə orqanlarına müraciət etməyi məsləhət görsələr də, o, təhlükəsizlik səbəbindən Azərbaycana qayıtmağa üstünlük verib.

Məlumata əsasən, Məhəmməd Pənahov hazırda Bakıda olan həyat yoldaşını telefonla hədələyib. Bununla bağlı qadın boşanma tələbi ilə Binəqədi Rayon Məhkəməsinə müraciət edib.

Hazırda məsələ ilə bağlı hüquqi proseslər davam edir. Məsələyə qarşı tərəfin münasibəti hələlik bəlli deyil.