İmişli rayon Ağsaqqallar Şurasının sədri Saleh Səmədov 9 May – Faşizm üzərində Qələbə Günü münasibətilə keçirilən tədbirdə SSRİ bayrağı altında çıxış etməsi və sinəsində “Georgi lenti” gəzdirməsi səbəbilə vəzifədən azad edilib. Bu barədə qərar Azərbaycan Ağsaqqallar Şurası İdarə Heyətinin mayın 13-də keçirilən növbədənkənar iclasında qəbul olunub.

Qurumun sədri Eldar Quliyev iclas zamanı məsələyə münasibət bildirərək qeyd edib ki, Səmədovun hərəkəti Azərbaycan cəmiyyətində ciddi narazılıq doğurub. İclasın yekununda onun həm İmişli rayon Ağsaqqallar Şurasının sədri vəzifəsindən, həm də Azərbaycan Ağsaqqallar Şurasının üzvlüyündən çıxarılması qərara alınıb.

Məsələyə hakim Yeni Azərbaycan Partiyasından da reaksiya gəlib. Partiyanın Təftiş Komissiyasının üzvü, Milli Məclisin deputatı Elman Nəsirov hadisəni qınayaraq bildirib ki, bu məsələ partiyanın müvafiq orqanları tərəfindən də qiymətləndirilə bilər. Onun sözlərinə görə, “Georgi lenti” rus imperiyasının rəmzi sayılır və bu kimi simvolların Azərbaycan cəmiyyətində yeri yoxdur.

Səmədov hələlik rəsmi açıqlama verməyib, lakin bəzi yerli saytlarla söhbətində tədbir zamanı müxtəlif bayraqların dalğalandığını qeyd edərək, “Azərbaycan bayrağından uca bayraq yoxdur” fikrini vurğulayıb.

Xatırladaq ki, Azərbaycan Ağsaqqallar Şurası SSRİ dövründə – 1989-cu ildə təsis olunub və 1990-cı ildə rəsmi qeydiyyata alınıb. Təşkilat müstəqillik dövründə də fəaliyyətini davam etdirərək bir neçə tanınmış şəxs tərəfindən idarə olunub. Hazırda Şuranın sədri keçmiş deputat Eldar Quliyevdir.