24 may 2025-ci il tarixində Goranboy rayonunun Səfikürd kəndində yerləşən kafelərdən birində bıçaqlanma hadisəsi baş verib. Hadisə nəticəsində iki nəfər – kənd sakinləri, 1985-ci il təvəllüdlü Zaur Muradov və 1987-ci il təvəllüdlü İsmayıl Məmmədov müxtəlif dərəcəli bıçaq xəsarətləri alıb.

Yaralılar Goranboy Rayon Mərkəzi Xəstəxanasının Təcili Tibbi Yardım şöbəsinə hospitalizasiya olunublar. TƏBİB-dən verilən məlumata görə, onlara sol boyun nahiyəsinin, kürək və bel nahiyələrinin kəsilmiş yaraları diaqnozu qoyulub. Pasiyentlərə ilkin tibbi yardım göstərildikdən sonra ambulator müalicə üçün evə buraxılıblar.

Goranboy Rayon Polis Şöbəsinin əməkdaşları tərəfindən həyata keçirilən operativ əməliyyat tədbirləri nəticəsində hadisəni törətməkdə şübhəli bilinən şəxs – 1981-ci il təvəllüdlü Vüsal Sarıyev saxlanılıb. Araşdırmalar zamanı məlum olub ki, insident şəxslər arasında yaranmış münaqişə zəminində baş verib.

Faktla bağlı araşdırmalar davam etdirilir.