Xaçmaz rayonunun Qalağan kəndində yerləşən və Cağacıqçayın üzərindən keçən körpü qəzalı vəziyyətə düşüb. Yerli sakinlərin Shimal.News-a verdiyi məlumata görə, son günlər bölgədə müşahidə olunan güclü yağışlar və çayda baş verən sel səbəbindən körpünün dayaqları ciddi zədələnib.

Sakinlərin sözlərinə görə, hazırda körpünün vəziyyəti kritikdir. Qurğunun bir neçə dayağının yerindən tərpəndiyi və hər an uçma təhlükəsinin olduğu qeyd olunur. Həm nəqliyyat vasitələrinin, həm də piyadaların bu körpüdən keçməsi hər keçən gün daha da təhlükəli hala gəlir.

“Biz neçə gündür qorxu içindəyik. Körpüdən istifadə etməyə məcburuq, baxmayaraq ki, onun hər an uçacağından ehtiyat edirik. İndiyə qədər xəsarət alan olmasa da, artıq vəziyyət kritikdir. Aidiyyəti qurumlar gəlib baxış keçirsinlər, yoxsa gec olacaq”, – deyə kənd sakinlərindən biri bildirib.

Yerli əhali narahatlıqla qeyd edir ki, bu körpü kəndi rayon mərkəzi ilə birləşdirən əsas keçid nöqtəsidir və onun tamamilə sıradan çıxması nəqliyyatın iflic olmasına, həmçinin fövqəladə vəziyyət zamanı təcili yardımın və digər xidmətlərin kəndə daxil olmasının çətinləşməsinə səbəb ola bilər.

Hazırda aidiyyəti qurumların məsələyə müdaxilə edib-etmədiyi barədə məlumat yoxdur. Sakinlər isə tezliklə tədbir görülməsini və körpünün təmir olunmasını tələb edirlər.

Mövzu ilə bağlı rəsmi qurumlardan açıqlama daxil olduqca xəbər yenilənəcək.