Naxçıvanda 49 yaşlı Fərzalı Behbudovun qətlə yetirilməsi ilə bağlı keçirilən məhkəmə prosesi hadisənin təfərrüatlarını üzə çıxarıb. Aydın olub ki, ağır cinayətin baş verməsinə səbəb sadə bir siqaret istəyi olub.

Cinayəti törətməkdə təqsirləndirilən 39 yaşlı Rəhman Bayramovla Fərzalı Behbudovun 20 illik dost olduqları bildirilir. Onlar uzun illər bir-birinin ailəsi ilə yaxın münasibətdə olub, mütəmadi olaraq görüşüb, qonaq gedib-gəliblər. Qətlin baş verdiyi gün də dostlar birlikdə yeyib-içmək üçün bir araya gəliblər. Məclis Rəhman Bayramovun evində təşkil olunub.

İstintaq materiallarına və məhkəmədə verilən ifadələrə əsasən, həmin gün hər iki şəxs xeyli miqdarda spirtli içki qəbul edərək sərxoş vəziyyətə düşüblər. Bu zaman Rəhman Bayramov dostundan bir siqaret istəyib. Lakin Fərzalı Behbudovun “cibinə siqaret al, qoy” kimi ironiya ilə cavab verməsi onların arasında mübahisəyə səbəb olub. Sözlü qarşıdurma tezliklə münaqişəyə çevrilib və əsəblərinə hakim ola bilməyən Rəhman stolun üzərindən bıçaq götürərək dostuna xəsarət yetirib. Fərzalı aldığı zərbələrdən hadisə yerində vəfat edib.

Məhkəmədə ifadə verən Rəhman Bayramov hadisəni belə xatırlayıb:
“Yeyib-içdikdən sonra ürəyim siqaret istədi. Dedim, bir siqaret ver. Qayıdıb dedi ki, ‘sən heç vaxt cibinə siqaret qoymursan’. Bu söz mənə ağır gəldi. Sözləşdik, söyüş söydü. Əsəbiləşdim, sonra nə baş verdiyi bəllidir…”

Məhkəmə istintaqı zamanı toplanmış sübutlar və şahid ifadələri əsasında Rəhman Bayramovun qəsdən adam öldürmə cinayətini törətdiyi sübuta yetirilib. Naxçıvan Ağır Cinayətlər Məhkəməsinin hökmü ilə o, 12 il müddətinə azadlıqdan məhrum edilib.