Televiziya aparıcısı Aytən Səfərova ötən il baş vermiş ölümlə nəticələnən yol qəzası ilə əlaqədar olaraq cinayət məsuliyyətinə cəlb edilib. Onun barəsində Cinayət Məcəlləsinin 263-1.3-cü maddəsi (nəqliyyat vasitəsini idarə etmək hüququ olmayan şəxs tərəfindən yol hərəkəti qaydalarının pozulması, ehtiyatsızlıqdan insan ölümünə səbəb olduqda) ilə cinayət işi başlanıb.

Hadisə 2024-cü ilin aprelində Xətai rayonu, 8 Noyabr prospekti ilə Sadıqcan küçəsinin kəsişməsində baş verib. Aytən Səfərovanın idarə etdiyi “Hyundai Accent” markalı avtomobil ilə “Hyundai İX-35” markalı avtomobil toqquşub. Qəza nəticəsində Aytən Səfərovanın avtomobilində olan 19 yaşlı Ayxan Əliyev dünyasını dəyişib.

İstintaq və ekspertiza nəticəsində müəyyən edilib ki, qəzanın baş verməsində hər iki sürücünün təqsiri olub. “Hyundai İX-35”in sürücüsü İsmayıl Məmmədov dönmə manevrini ikinci zolaqdan və qırmızı işıqda edərək qaydaları pozub. Ekspertiza həmçinin bildirib ki, Aytən Səfərova sürət həddini aşıb və bu səbəbdən hadisənin qarşısını almaq imkanı olmayıb.

Bundan başqa, qəza zamanı Aytən Səfərovanın sürücülük vəsiqəsinin etibarlılıq müddəti bitmiş olub, yəni o, avtomobili sürücülük hüququ olmadan idarə edib.

İsmayıl Məmmədova məhkəmənin hökmü ilə məntəqə tipli cəzaçəkmə müəssisəsində çəkməklə 3 il həbs cəzası verilib. Aytən Səfərova ilə bağlı isə istintaq prosesi davam edir.