1 milyon manatlıq dələduzluq ittihamı ilə həbs edilən müğənni Rəqsanə İsmayılovanın cinayət işinə yeni ad əlavə olunub. Onun həyat yoldaşı, iş adamı Fazil Əmiraslanov da eyni iş üzrə cinayət məsuliyyətinə cəlb edilib.

Məlumata görə, F.Əmiraslanov xüsusilə külli miqdarda mənimsəmədə ittiham olunur. O, təqsirləndirilən şəxs qismində tanınsa da, həbs edilməyib. Onun barəsində “polisin nəzarəti altına vermə” qətimkan tədbiri seçilib. Bu səbəbdən iş adamı istintaq başa çatana qədər ölkədən çıxa bilməyəcək.

Məsələ ilə bağlı məlumatı onun vəkili Ramal Şahmarov təsdiqləyib.

Cinayət işi hazırda Sabunçu Rayon Polis İdarəsində araşdırılır. Rəqsanə İsmayılova və Fazil Əmiraslanova qarşı Cinayət Məcəlləsinin 178.4-cü (dələduzluq – xüsusilə külli miqdarda törədildikdə) maddəsi ilə ittiham irəli sürülüb. Qanunvericiliyə görə, dəymiş ziyan ödənilmədiyi halda bu maddə ilə təqsirli bilinən şəxsi 10 ildən 14 ilə qədər azadlıqdan məhrumetmə cəzası gözləyir.